އެއާޕޯޓާ އެކު ހއ. ގެ ޓުއަރިޒަމަށް އާ އުންމީދެއް!

ރާއްޖޭގެ އިގްތިސޯދު މުޅިން ކަހަލަ ގޮތަކަށް ޓުއަރިޒަމަށް ބަރޯސާ ވިޔަސް ދާދި ފަހަކާ ޖެހެންދެން ވެސް އެ އިންޑަސްޓްރީ ބެހިފައި އޮތީ މަދު ސަރަހައްދަކަށެވެ. އެ ގޮތުން ޓުއަރިޒަމް ހިފެހެއްޓިފައި އޮތީ މާލެ އަތޮޅާއި މާލެ ވަށައިގެން ހުރި މެދު ރާއްޖެތެރޭގެ އަތޮޅުތަކުގައެވެ. ދެކުނާއި އުތުރުގެ އަތޮޅުތަކަށް ޓުއަރިޒަމް އަދިވެސް އޮތީ އެކަށީގެންވާ ގޮތެއްގައި ނުފެތުރިއެވެ. ސަބަބުތައް ގިނައެވެ. އިންޓަނޭޝަނަލް އެއާޕޯޓަކީ މާލެ ކަމަށްވުމުން ދަތުރު ފަތުރުގެ އުނދަގޫތަކަކީ ވެސް އުތުރާއި ދެކުނުގައި ރިސޯޓްތައް މަދު ސަބަބުތަކެވެ. ހާއްސަކޮށް އުތުރުގެ ތިން އަތޮޅުގައި ވެސް އެކަށީގެންވާ ގޮތެއްގައި ޓުއަރިޒަމް ފުޅާވެފައެއް ނުވެއެވެ. ނަމަވެސް މިކަން ބަދަލުވުމުގެ ކޮޅުމަތި މިހާރު ވަނީ ފެންނަން ފަށާފައެވެ. ބުރާސްފަތި ދުވަހު ހުޅުވި ހއ. ހޯރަފުށީ އެއާޕޯޓާ އެކު މި މަންޒަރު ބަދަލުވުމުގެ އުންމީދު ވަނީ އާވެފައެވެ.

ހޯރަފުށީގެ އެއާޕޯޓަކީ ރާއްޖޭގެ އެންމެ އުތުރުގެ ތަރައްގީގެ މަންޒަރު ބަދަލުކޮށްލާނެ އެއާޕޯޓަކަށް ވާނެއެވެ. މި ވަގުތު ދެ ރިސޯޓެއް ހިންގަމުން އައި ނަމަވެސް މުސްތަގުބަލުގައި އިތުރު ރިސޯޓްތަކާއި ގެސްޓް ހައުސްގެ ވިޔަފާރި ފުޅާވެގެންދާނެ ކަމަށް ބެލެވެއެވެ. ހާއްސަކޮށް ގެސްޓްހައުސް ވިޔާފާރި އަށް ވަރަށް ބޮޑު ކުރިއެރުމެއް އަންނާނެ ކަމަށް ބެލެވެއެވެ. އެ ކަމަށްޓަކައި އެ ސަރަަހައްދުގެ ރަށްތަކުން މިހާރު ވަނީ ތައްޔާރީތައް ވާން ފަށާފައެވެ. ޓުއަރިޒަމްގެ ހަރަކާތްތަކަށް ބިން ދޫކުރުން ފަދަ ކަންކަން މިހާރު ވަނީ ފަށާފައެވެ. އެ ގޮތުން ހޯރަފުށިން ރަށު ފަތުރުވެރިކަމަށް ދޫކުރާނެ ބިންތައް، ޤާނޫނުގައިވާ ގޮތުގެ މަތިން، ޕްލޭނިންގ މިނިސްޓްރީގެ ލަފަޔާ އެކު، މިދިޔަ ހޯމަ ދުވަހު ކަނޑައަޅުއްވާފައިވާ ކަމަށް ވެސް ރައީސް އިބްރާހީމް މުހައްމަދު ސޯލިހް ބުރާސްފަތި ދުވަހު ވިދާޅުވެފައި ވެއެވެ. އެހެންކަމުން ކައިރި މުސްތަގުބަލެއްގައި ކައުންސިލްގެ ފަރާތުން އެތަންތައް ބީލަމަށް ހުޅުވާލާނެ ކަމަށް ބެލެެވެއެވެ.

advertisement

ހއ. ކެލަޔަކީ ވެސް މީގެ ކުރިން ވެސް ގެސްޓް ހައުސް ވިޔަފާރީގައި ކުރިއެރުންތަކެއް ހޯދާފައިވާ ރަށެކެވެ. އެ ރަށުގެ ރީތި ދޮންވެލި ގޮނޑުދޮށް ވަނީ ބައިނަލްއަގުވާމީ އެވޯޑްތަކާއި އެތައް ބައެއްގެ ސަމާލުކަން ހޯދާފައެވެ. މިހާތަނަށް އެ ރަށުގެ ރަށު ފަތުރުވެރިކަން ވެސް ފުޅާވެގެން ދިއުމަށް އޮތް އެންމެ ބޮޑު ހުރަހަކަށް އޮތީ ދަތުރުފަތުރެވެ. ހޯރަފުށީ އެއާޕޯޓާ އެކު އެ ރަށުގެ ފަތުރުވެރިކަމަށް ވެސް ބޮޑު އިންގިލާބެއް އަންނާނެ ކަމަށް ބަލެވެއެވެ. އެގޮތުން، ކެލާގައި ޓޫރިސްޓް ހޮޓަލެއް ތަރައްޤީކުރުމަށް، 800،000 އަކަފޫޓަށް ވުރެ ބޮޑު ބިމެއް މިދިޔަ އާދީއްތަ ދުވަހު ވަނީ ބީލަމަށް ހުޅުވައިލާފައެވެ. މިއީ އެ ރަށަށް ތަރައްގީގެ އިންގިލާބީ ބަދަލެއް ގެންނާނެ މަޝްރޫއަކަށް ވާނެއެވެ. ރަށުގައި ތިބެގެން އާމްދަނީ ހޯދުމަށް އެތައް ފުރުސަތުތަކެއް މި މަޝްރޫއާ އެކު ވެސް ހުޅުވިގެންދާނެއެވެ. ހއ. އަތޮޅުގައި އެއާޕޯޓެއް ހުޅުވުމަކީ މި މަޝްރޫއުގެ ޝައުގުވެރިކަން އިތުރުވާނެ ކަމެކެވެ.

މީގެ އިތުރުން ހއ. އުލިގަމަކީ އެތައް ޒަމާނެއް ކުރިން ފެށިގެން ދަތުރުވެރިންގެ އެއް މަންޒިލެވެ. އެ ސަރަހައްދުން ދަތުރުކުރާ ބޭރުގެ އެތައް ޔޮޓެއް މިހާރު ވެސް އެ ރަށުގައި ބަނދަރުކުރެއެވެ. ކުރީގެ ސަރުކާރުން ބަނދަރު ފީ ބޮޑުކުރުމާ ގުޅިގެން ދުވަސްކޮޅަކަށް ޔޮޓްތައް އެ ރަށާ ދުރަށް ދިޔަ ނަމަވެސް މި ސަރުކާރު ފީތަކަށް ގެނައި ހެޔޮ ބަދަލާ އެކު އަނެއްކާ ވެސް އުލިގަމު ކައިރި ވަނީ ޔޮޓްތަކުން ފުރެން ފަށާފައެވެ. ހޯރަފުށީގެ އެއާޕޯޓާ އެކު އުލިގަމުގެ ފަތުރުވެރިކަމަށް ވެސް އިތުރު އުޖާލާކަމެއް އަންނާނެ ކަމުގެ އުންމީދު ބޮޑެވެ.

އެ އަތޮޅު އިހަވަންދޫއަކީ މިހާރު ވެސް މަސްވެރިކަމުގައި ނަމޫނާ ރަށެކެވެ. އެއާޕޯޓުގެ ސަބަބުން މަސްވެރިކަމުގެ އިތުރުން އެ ރަށުގައި ވެސް ޓުއަރިޒަމް އާލާވެގެން ދިއުމުގެ ފުރުސަތު ބޮޑެވެ. ދަތުރު ފަތުރު ފަސޭހަވެގެން ދިއުމަކީ އިގްތިސާދީ ހަރަކާތްތައް އިތުރުވެގެންދާ މައިގަނޑު އެއް ސަބަބެވެ.

އަނެއްކޮޅުން ހއ. އަތޮޅުގައި ޓުއަރިޒަމް ފުޅާކުރުމަށް ސަރުކާރުގެ ޕްލޭނެއް ވެސް އެބަ އޮތެވެ. އެ ގޮތުން، ދިއްދޫގެ ދެކުނުން އޮތް އަލިދުއްފަރުފިނޮޅާއި ހޯރަފުށީގެ އުތުރުން އޮންނަ މެދަފުށި ވެސް، ރިޒޯޓެއްގެ ގޮތުގައި ތަރައްޤީކުރުމަށް ވަރަށް އަވަހަށް ބީލަމަށް ލެވޭނެ ކަމަށް ރައީސް ސޯލިހް ބުރާސްފަތި ދުވަހު އިއުލާންކުރެއްވިއެވެ.

“ތަނެއް ތަރައްޤީވެ ކުރިއަރައި ދިޔުމަށް ބޭނުންވާ އެންމެ މުހިންމު ކަމަކީ، ދަތުރުފަތުރު ކުރެވޭނެ، އަދި ފަސޭހައިން މުދާ އުފުލޭނެ ލުއިފަސޭހަ ގޮތްތަކެއް ހަމަޖެހިފައި އޮތުން. އަޅުގަނޑުގެ އަމާޒަކީ، މީހުން އުޅޭ ކޮންމެ ރަށަކުންވެސް، ފަސޭހަކަމާއެކު އަވަހަށް ދެވޭ ހިސާބުގައި، އެއަރޕޯރޓެއް އޮންނަ ގޮތަށް، ވައިގެ ބަނދަރުގެ ދަތުރުފަތުރުތައް، ވިއުގައަކުން މުޅި ރާއްޖެ ގުޅައިލުން. އަދި އެއަރޕޯރޓްތަކާ ކައިރީގައިވާ އެހެން ރަށްތައް، ރަނގަޅު ފެރީ ވިއުގައަކުން ގުޅާލަދިނުން،” ހޯރަފުށީ އެއާޕޯޓް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ސޯލިހް ވިދާޅުވިއެވެ.

ހޯރަފުށި އެއާޕޯޓްގެ އިތުރުން ހދ. ހަނިމާދޫ އެއާޕޯޓް ބައިނަލްއަގުވާމީ އެއާޕޯޓަކަށް ބަދަލުކުމުގެ މަޝްރޫއު މިހާރު އޮތީ ވަރަށް ކައިރީގައެވެ. އަންނަ އަހަރު އެ މަޝްރޫއު ފެށިގެންދާ އިރު މިއީ ވެސް އުތުރުގެ އަތޮޅުތަކުގެ ތަރައްގީ އަށް ހާއްސަކޮށް ހއ. އަދި ހދ. އަތޮޅުގެ ރަށްތަކުގެ ތަރައްގީ އަށް އިންގިލާބީ ބަދަލުތަކެއް އަންނާނެ ކަމެކެވެ.

“ފަތުރުވެރިކަން ލާމަރުކަޒު ކުރާއިރު، އެންމެ މުހިންމު ކަމަކީ، މާލެ ނޫން ސަރަޙައްދުތަކަށް ބޭރުގެ ފްލައިޓްތައް ޖެއްސޭނެ އިންތިޒާމުތައް ހަމަޖެއްސުން. އެކަމަށްޓަކައި، ހަނިމާދޫގައި މުޅިން އައު ބައިނަލްއަޤްވާމީ އެއަރޕޯރޓެއް ހެދުމުގެ މަސައްކަތް އިރާދަކުރެއްވިއްޔާ އަންނަ އަހަރު ފެށިގެންދާނެ. އެ މަސައްކަތް ނިމޭއިރު، ބޭރުގެ ފްލައިޓްތަކުން އަންނަ ފަތުރުވެރިން ސީދާ ތިލަދުންމައްޗަށް ފައިބަން ފަށާނެ،” ރައީސް ވިދާޅުވިއެވެ.