ފަތުރުވެރިންނަށް ޙިދުމަތްދިނުމަށް މިހާތަނަށް 349 ތަނެއް ހުޅުވައިފި

ފަތުރުވެރިންނަށް ޚިދުމަތްދިނުމަށް މިވަގުތު ރާއްޖޭގައި 349 ފެސިލިޓީއެއް ހުޅުވާފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އެންމެ ފަހުން ޢާންމުކޮށްފައިވާ ތަފާސްހިސާބުތައް ދައްކާގޮތުން ޖުލައި 15އިން މިމަހުގެ 18ގެ ނިޔަލަށް ފަތުރުވެރިންނަށް ޚިދުމަތްދިނުމަށް 33،776 އެނދު ވަނީ އޮޕަރޭޝަނަށް ގެނެސްފައެވެ. މިއީ މުޅި ޖުމްލަ 349 ފެސިލިޓީއެކެވެ. އޭގެތެރޭގައި ހިމެނެނީ 125 ރިސޯޓާއި، 189 ހޮޓެލް އަދި ގެސްޓްހައުސްއާއި، 122 ސަފާރީ އުޅަނދެވެ.

ކޯވިޑް19 ރާއްޖޭގައި ފެތުރެންދެށުމާއިއެކު އެޅި ރައްކާތެރިކަމުގެ ފިޔަވަޅެއްގެ ގޮތުގައި ފަތުރުވެރިންނަށް ޙިދުމަތްދޭ ތަންތަން ވަނީ ބަންދުކޮށްފައެވެ. އަދި ހާލަތައް ބެލުމަށްފަހު ފަތުރުވެރިންނަށް ޙިދުމަތްދޭ ތަންތަން ހުޅުވުމުގެ ފުރުސަތު މިނިސްޓްރީން އަންނަނީ ދޫކުރަމުންނެވެ. އެގޮތުން ރިސޯޓް އަދި ސަފާރީތައް އަލުން ހުޅުވުމުގެ ހުއްދަ ދީފައިވަނީ ޖުލައި މަހުގެ 15ވަނަ ދުވަހުއެވެ. އަދި ގެސްޓްހައުސްތައް ހުޅުވާލުމުގެ ހުއްދަ ދީފައިވަނީ އޮކްޓޯބަރ މަހުގެ 15ވަނަ ދުވަހުއެވެ.

ރާއްޖޭގެ ބޯޑަރު ހުޅުވާލިފަހުން މިހާތަނަށް 59،105 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ.
ޓޫރިޒަމް މިނިސްރީން މިހާރު ވަނީ ފަތުރުވެރިންނަށް ސްޕްލިޓް ސްޓޭގެ ހުއްދަވެސް ދީފައެވެ. މީގެ ސަބަބުން ފަތުރުވެރިންނަށް ޚިދުމަތްދޭ އެއް ފެސިލިޓީން އަނެއް ފެސިލިޓީއަށް ދެވޭނެއެވެ. ރާއްޖެ އަންނަ ފަތުރުވެރިން އިތުރުވަމުން އަންނައިރު ފަތުރުވެރިން ރާއްޖެ އަންނައިރު ކޯވިޑް-19އަށް ޓެސްޓްކޮށްފައިވާ 96 ގަޑިއިރު ހަމަނުވާ ޕީސީއާރު ޓެސްޓެއް އޮންނަން ޖެހެއެވެ.

advertisement