24 ރަށެއްގެ 100 އަށްވުރެ ގިނަ ގެސްޓްހައުސް ހުޅުވުމުގެ ހުއްދަ ދީފި

އަތޮޅުތެރޭގެ ރަށްތަކުގެ 100 އަށްވުރެ ގިނަ ގެސްޓް ހައުސް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފިއެވެ.

މީހުން ދިރިއުޅޭ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ އޮކްޓޯބަރުމަހުގެ 15 ވަނަ ދުވަހުއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 19 ވަނަ ދުވަހުގެ ނިޔަލަށް މީހުން ދިރިއުޅޭ 24 ރަށެއްގެ 102 ގެސްޓްހައުސްއެއް ހުޅުވުމުގެ ހުއްދަ ވަނީ ދީފައެވެ. މި 102 ގެސްޓްހައުސްއާއިއެކު ގެސްޓްހައުސް ސިނާއަތުގައި މިވަގުތު ރާއްޖޭގައި ފަތުރުވެރިންނަށް ޚިދުމަތްދެމުންދާ އެނދުގެ އަދަދަކީ 2132 އެކެވެ. އަދި މިއީ މުޅި ޖުމްލަ 1066 ކޮޓަރިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

ފަތުރުވެރިންނަށް ޙިދުމަތްދިނުމުގެ ހުއްދަ މިވަގުތު ދީފައިވާ ރަށްރަށުގެ ތެރޭގައި ހިމެނެނީ ކ. ހުރާ، ކ. މާފުށި، ކ. ގުރައިދޫ، ކ. ހިންމަފުށި، ކ. ގުޅި، ކ. ތުލުސްދޫ، ކ. ގާފަރު އެވެ. މީގެއިތުރުން ބ. ކަމަދޫ، އއ. މަތިވެރި، އއ. އުކުޅަސް، އއ. ތޮއްޑޫ، އއ. ރަސްދޫ، އދ. ދިގުރަށް، އދ. އޮމަދޫ، ވ. ފުލިދޫ، ވ. ތިނަދޫ، ވ. ކެޔޮދޫވެސް ހިމެނެއެވެ. އަދި ބ. ދަރަވަންދޫ، ބ. ކިނޮޅަސް، ބ. ކަމަދޫ، ނ. ފޮއްދޫ، ޏ.ފުވައްމުލައް، އައްޑޫ ސިޓީ، ފޭދޫ އައްޑޫ ސިޓީ، މަރަދޫ ފޭދޫ ގެ ގެސްޓްހައުސްތަކަށްވެސް ވަނީ ހުޅުވުމުގެ ހުއްދަ ދީފައެވެ.
 

advertisement

އަތޮޅުތެރޭގެ ގެސްޓްހައުސްތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދިންނަމަވެސް މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ އަދި ޓޫރިޒަމް މިނިސްޓްރީން ދީފައެއްނުވެއެވެ.

މީހުން ދިރިއުޅޭ ރަށްރަށުގެ ގެސްޓް ހައުސްތައް އަލުން ހުޅުވުމަށް މިނިސްޓްރީން ހުއްދަދޭއިރު އެންމެ ފުރަތަމަ ކަމެއްގެ ގޮތުގައި ބަލާނީ ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަކޮށްފައިވޭތޯއެވެ. އެގޮތުން ކަރަންޓީނާއި، އައިސޮލޭޝަންގެ އިންތިޒާމްތަކާއި، ޞިއްޙީގޮތުން ފުރިހަމަކުރަންޖެހޭ ކަންކަން ފުރިހަމަކޮށްފައިވާކަން އެ ރަށެއްގެ ކައުންސިލުން މިނިސްޓްރީއަށް ކަށަވަރުކޮށްދޭންޖެހެއެވެ.