ޒުވާނުންނަށް އަމާޒުކޮށްގެން އޮންލައިން އާރޓް ވޯކްޝޮޕެއް ބާއްވަނީ

“ޔޫތު ވިޝަން” ގެ ނަމުގައި ޒުވާނުންނަށް އަމާޒުކޮށްގެން އޮންލައިން އާރޓް ވޯކްޝޮޕެއް ބޭއްވުމަށް ނިންމައިފިއެވެ.

މިވޯކްޝޮޕް އަމާޒުކޮށްފައިވަނީ އުމުރުން 16 އަހަރާއި 25 އަހަރާ ދެމެދުގެ ޒުވާނުންނަށެވެ. މިއީ ކޯވިޑް-19ގެ ބަލިމަޑުކަމުގެ ސަބަބުން ދިމާވެފައިވާ ބައެއް ގޮންޖެހުންތަކަށް އަލިއަޅުވާލުމާއިއެކު ކުރިމަގުގައި ކަންކަމުގައި އިސް ދައުރެއް އަދާކުރުމަށް ޒުވާނުން ބިނާކުރުމާއި، އަމިއްލަ ވިސްނުން ބޭނުންކޮށްގެން އިޖްތިމާޢީ ކަންކަމާމެދު މަޝްވަރާކޮށް ޙައްލު ހޯދަން ދަސްކުރުމުގެ ހުނަރު އުނގަންނައިދިނުމުގެ މަޤްޞަދުގައި ކުރިއަށްގެންދާ ހަރަކާތެކެވެ.

މި ވޯކްޝޮޕްގައި ބައިވެރިވުމަށް އެޕްލައިކުރުމުގެ ފުރުޞަތު މިމަހުގެ 26 ވަނަ ދުވަހާ ހަމައަށް ވަނީ ހުޅުވާލާފައެވެ. މި ވޯކްޝޮޕް ފަށާނީ އަންނަ މަހުއެވެ. ވާކްޝޮޕް ކުރިއަށްދާނީ ހަފްތާއެއްގެ މުއްދަތަކަށެވެ. މި ވޯރކްޝޮޕުގައި އޮންލައިންކޮށް ކްލާސްތައް ނަގައިދިނުމުގެ އިތުރުން ބައިވެރިން އަމިއްލައަށް އާރޓްގެ މަސައްކަތް ފަރުމާކުރުމަށް 3 ދުވަސް ޚާއްސަކޮށްފައިވެއެވެ.
މި ވޯކްޝޮޕަކީ އދ. ގެ ތަރައްޤީއާއި ބެހޭ ޖަމިއްޔާ، ޔޫ.އެން.ޑީ.ޕީގެ އިސްނެގުމާއެކު، މިނިސްޓްރީ އޮފް ޔޫތު ސްޕޯރޓްސް ކޮމިއުނިޓީ އެމްޕަވަރމަންޓާއި، އޫރިދޫ މޯލްޑިވްސް އާއި ޔޫރަޕިއަން ޔޫނިއަން ގުޅިގެން ކުރިއަށްގެންދާ ވޯކްޝޮޕެކެވެ.

ޔޫތު ވިޝަން ވޯރކްޝޮޕްގެ އަމާޒަކީ ރައްކާތެރި މާޙައުލެއްގައި އެކަކުއަނެކަކަށް އިހްތިރާމާއެކު މިމުޖުތަމަޢުގައި ހުރި އެކިއެކި ކަންކަމަށް އަލިއަޅުވާލާ، އެކުވެރި، މިނިވަން މާޙައުލެއްގައި ވާހަކަދައްކާ، ޚިޔާލުބަދަލުކޮށް، މަޝްވަރާކުރުމެވެ.