އޯއައިސީގެ 47 ވަނަ ބައްދަލުވުމުގައި ޝާހިދު ބައިވެރިވެވަޑައިގެންފި

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ކައުންސިލް އޮފް މިނިސްޓާސްގެ 47 ވަނަ ބައްދަލުވުމުގައި ރާއްޖޭގެ ޚާރިޖީ ވަޒީރު އަބްދުﷲ ޝާހިދު ބައިވެރިވެވަޑައިގެންފިއެވެ. 

މި ފަހަރުގެ ބައްދަލުވުން އޮތީ އެފްރިކާ ބައްރުގެ ގައުމެއް ކަމަށްވާ ނީޖަރުގައެވެ. މި އަހަރުގެ ޝިއާރަކީ”ސުލްހަ އާއި ތަރައްގީ އަށް ގުޅިގެން، ޓެރަރިޒަމާ ދެކޮޅަށް” އެވެ. 

advertisement

ފޮރިން މިނިސްޓްރީން ބުނީ މި ބައްދަލުވުމުގައި 57 ގައުމެއްގެ ޚާރިޖީ ވަޒީރުން ބައިވެރިވެވަޑައިގެން މުސްލިމް އުއްމަތަށް ކުރިމަތިވެފައިވާ ގޮންޖެހުންތަކާއި ސިޔާސަތުތަކާ ބެހޭ ގޮތުން ވަޒީރުން މަޝްވަރާކުރެއްވި ކަމަށެވެ.

މިނިސްޓަރުގެ ޝާހިދު ވެސް ވަނީ މި ބައްދަލުވުމުގައި ވާހަކަފުޅު ދައްކަވާފައެވެ. އެ މަނިކުފާނުގެ ވާހަކަފުޅު ބައްޓަންކުރައްވާފައި ވަނީ ކޮވިޑްގެ ސަބަބުން ކުރިމަތިވެފައިވާ މައްސަލަތަކަށެވެ. އެ ގޮތުން ކޮވިޑްގެ ސަބަބުން ސިއްހީ، އިޖުތިމާއީ ަދި އިގްތިސާދީ ގޮތުން ރާއްޖެ އަށް ކުރިމަތިވެފައިވާ މައްސަލަތަކާއި އެކަންކަމުގައި އަރައިގަތުމަށް ރާއްޖެއިން ކުރަމުން އަންނަ މަސައްކަތްތަކާ ގުޅޭ ގޮތުން މައުލޫމާތު ދެއްވިއެވެ. 

މީގެ އިތުރުން އޯއައިސީގައި ހިމެނޭ ކުދި ގައުމުތަކަށް ކޮވިޑް-19ގެ ސަބަބުން ކުރިމަތިވެފައިވާ އިގްތިސާދީ މައްސަލަތައް ބޮޑުކަން މިނިސްޓަރު ޝާހިދު ފާހަގަކުރައްވާފައި ވެއެވެ. އެހެންކަމުން އެ ގައުމުތަކަށް މާލީ އެހީތެރިކަން ފޯރުކޮށްދިނުމަށް ޝާހިދު ގޮވައިލެއްވިއެވެ. އަދި ޖީ-20ގެ ގައުމުތަކަށް ދައްކަންޖެހޭ ދަރަންޏަށް ލުއި ދިނުމުގެ ފްރޭމްވޯކާ ހަމައަށް ގޮސްފައިވާތީ ޝާހިދު ވަނީ އެކަމަށް މަރުހަބާ ވިދާޅުވެފައެވެ.

އިސްމީ އުއްމަތަށް ކުރިމަތިވެފައިވާ މައްސަލަތަކާ ބެހޭ ގޮތުން ވެސް މިނިސްޓަރު ޝާހިދު ވާހަކަ ދެއްކެވިއެވެ. އެ ގޮތުން ޓެރަރިޒަމާ ދެކޮޅަށް އޯއައިސީގެ ގައުމުތަކުން މަސައްކަތްކުރުމަށް ވެސް ޝާހިދު ގޮވާލެއްވިއެވެ. މީގެ އިތުރުން އިސްލާމް ދީނާއި މުސްލިމުންނަށް ދޭ އަނިޔާތައް ހުއްޓުވުމަށް ބައިނަލްއަގުވާމީ މުޖުތަމައުގައި މަސައްކަތްކުރެވޭނެ ނިޒާމެއް ގާއިމުކުރުމަށް ވެސް މިނިސްޓަރު ގޮވާލެއްވިއެވެ. 

ރޮހިންޔާގެ މުސްލިމުންގެ މައްސަލައަށް ވެސް ޝާހިދު ވަނީ އަލިއަޅުވާލައްވާފައެވެ. އެ ގޮތުން ރޮހިންޔާ މުސްލިމުންނަށް ލިބެމުންދާ އަނިޔާތަކަށް އިންސާފު ހޯދައިދިނުމަށް ބައިނަލްއަގުވާމީ ކޯޓުގައި ގެމްބިއާއާ އެކު ރާއްޖެ އިން މަސައްކަތްކުރާކަން މިނިސްޓަރު ފާހަގަކުރެއްވިއެވެ. 

މީގެ އިތުރުން ފަލަސްތީނުގެ މައްސަލައަށް ވެސް ޝާހިދު އަލިއަޅުވާލެއްވިއެވެ. އެގޮތުން މިނިވަން ދައުލަތެއް ގާއިމުކުރުމަށް މަސައްކަތްކުރަމުން އަންނަ ފަލަސްތީނުގެ ރައްޔިތުންނަށް ކޮވިޑް-19ގައި ކުރިމަތިވަމުންދާ ދަތިތައް ފާހަގަކުރެއްވިއެވެ. އަދި ފަލަސްތީނުގެ ވެރިރަށަކީ އިރުމަތީ ގުދުސްކަން ރާއްޖެ އިން އަބަދުވެސް ގަބޫލުކުރާ ކަމަށް މިނިސްޓަރު ވިދާޅުވިއެވެ.