ޤަތަރު އެއާވޭސް އިން ރާއްޖެއަށް ކުރާ ދަތުރުތައް އިތުރުކުރަނީ

ޤަތަރު އެއާވޭސް އިން ރާއްޖެއަށް ކުރާ ދަތުރުތައް އިތުރުކުރަން ނިންމައިފިއެވެ. ޤަތަރު އެއަރވޭސްއިން ބުނީ ޑިސެމްބަރ 17 އިން ފެށިގެން ކޮންމެ ދުވަހަކުވެސް އެއާލައިންގެ 3 ފްލައިޓް ރާއްޖެއަށް ބާއްވާނެ ކަމަށެވެ.

އެ އެއަރލައިނުން ރާއްޖެއަށް ބާއްވާ ދަތުރުތަކުގައި ބޭނުންކުރުމަށް ހަމަޖެހިފައިވަނީ، ބޮއިންގް 300-777 މަރުކާގެ ދެ މަތިންދާ ބޯޓާއި، ބޮއިންގް 8-787 މަރުކާގެ އެއް ބޯޓެވެ.

ޤަތަރު އެއާވެއިސް އިން ރާއްޖެއަށް ކުރާ ދަތުރުތައް އިތުރު ކޮށްފައި މިވަނީ ދާދި ފަހު އެ އެއާލައިނުން ރާއްޖެއާއި ދެމެދު ޓްރެވެލް ބަބްލް އެއް ޤާއިމުކޮށް އޭގެ ޕެކޭޖްތައް ތަޢާރަފު ކުރުމަށް ފަހުގައެވެ. މި ޕެކޭޖުގައި އަންނަ ޑިސެމްބަރު މަހުން ފެށިގެން ދަތުރު ކުރެވޭނެ ކަމަށް ޤަތަރު އެއާވެއިސް އިން ވަނީ ހާމަ ކޮށްފައެވެ.

މި ޓްރެވެލް ބަބުލްގެ ތެރެއިން ދަތުރު ކުރައްވާ ފަރާތްތައް އަނބުރާ ޤައުމަށް ދިއުމާއެކު ކަރަންޓީނު ވާން ނުޖެހޭނެކަމަށްވެސް އެ އެއާލައިނުން ބުނެއެވެ.

ކޯވިޑް19 އަށްފަހު ރާއްޖޭގެ ބޯޑަރު ހުޅުވާލުމާއިއެކު މިހާތަނަށް އެންމެ ގިނަ ފަތުރުވެރިން ރާއްޖެއަށް ދަތުރުކޮށްފައިވަނީ ޤަތަރު އެއަރވޭސްގެ ފްލައިޓްތަކުގައިކަމަށް ތަފާސް ހިސާބުތަކުން ދައްކައެވެ.

advertisement