ޒިޔަތު ދައުވާތަކަށް އެއްބަސްވުމުން 11 އަހަރުގެ ހުކުމަކަށް ދައުލަތުން އެދިއްޖެ!

މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ ބޮޑު ހިޔާނާތާ ގުޅިގެން އެ ކުންފުނީގެ ކުރީގެ މެނޭޖިންގް ޑިރެކްޓަރު އަބްދުﷲ ޒިޔަތުގެ މައްޗަށް ދައުލަތުން ކުރި 32 ދައުވާއަކަށް އެއްބަސްވުމުން 11 އަހަރުގެ ޖަލު ހުކުމަކަށް ދައުލަތުން އެދިއްޖެއެވެ.

ޒިޔަތުގެ މައްޗަށް ދައުލަތުން ކޮށްފައި ވަނީ ފަޅު ރަށްތަކާއި ފަޅުތައް ކުއްޔަށް ދީގެން ދައުލަތަށް ލިބެންޖެހޭ ފައިސާ ހިޔާނާތްތެރިވިކަމުގެ ދައުވާތަކެވެ. އެ ދައުވާތަކުގައިވާ ގޮތުން ދައުލަތަށް ލިބެންޖެހޭ 50.7 މިލިއަން ރުފިޔާ (781.7 މިލިއަން ޑޮލަރު) އަށް އަރައެވެ.

advertisement

ކްރިމިނަކް ކޯޓުގައި އޮތް އަޑުއެހުމުގައި މި ދައުވާތަކަށް ޒިޔަތު ވަނީ އެއްބަސްވެފައެވެ. ޒިޔަތު މި ދައުވާތަކަށް އެއްބަސްވެފައި މި ވަނީ ދައުލަތަށް އެއްބާރުލުން ދީ އަދަބު ލުއިކުރުމުގެ އެއްބަސްވުމެއް ދައުލަތާ އެކު ހަދައިގެންނެވެ.

ދައުވާތަކަށް ޒިޔަތު އެއްބަސްވުމާ އެކު ދައުލަތުން އެދުނީ 11 އަހަރުގެ ޖަލު ހުކުމަކަށެވެ. ހުކުމާ ބެހޭ ގޮތުން ޒިޔަތުގެ ފަރާތުން ވަކި އެއްޗެއް ނުބުނެއެވެ.

ދައުވާތަކަށް އެއްބަސްވުމަށް ފަހު ޒިޔަތު ކޯޓުގައި ބުނެފައި ވަނީ އެ ރަށްތަކާއި ފަޅުތަކަށް ލިބެންޖެހޭ ފައިސާގެ ޗެކްތަކާ ހަވާލުވުމަށް ފަހު އެ ޗެކްތައް ކުރީގެ ނައިބު ރައީސް އަހްމަދު އަދީބާއި އަދި އޭނާ އެންގި އެހެން ފަރާތްތަކާ ހަވާލުކޮށްފައިވާނެ ކަމަށެވެ. އެހެން ނަމަވެސް އެއިން އެއްވެސް ފައިސާއެއް އޭނާ ބޭނުންކޮށްފައި ނުވާ ކަމަށް ކޯޓުގައި ބުނެފައި ވެއެވެ. މީގެ ކުރިން އަދީބު ވެސް ދައުވާތަކަށް އެއްބަސްވުމުން ކޯޓުން ވަނީ 20 އަހަރު ދުވަހުގެ ޖަލު ހުކުމެއް އިއްވާފައެވެ. އަދި ދެ މިލިއަން ރުފިޔާ އިން ޖޫރިމަނާކޮށްފައި ވެއެވެ.

ދައުލަތުން ބުނެފައި ވަނީ އެމްއެމްޕީއާރުސީގެ ހިޔާނާތުގެ ސަބަބުން ދައުލަތަށް ލިބެންޖެހޭ ފައިސާ ހޯދުމުގެ ދައުވާތައް ވަކިން ކުރިއަށް ގެންދާނެ ކަމަށެވެ.

މިއަދުގެ އަޑުއެހުމާ އެކު މި މައްސަލައިގެ އަޑުއެހުންތައް ނިމިފައިވުމުން އަންނަ ހަފުތާގެ އާދީއްތަ ދުވަހު މައްސަލައިގެ ހުކުމް ކުރުމަށް ވަނީ ތާވަލްކޮށްފައެވެ.

ޒިޔަތު މިހާރުވެސް ހުރީ 2016 ވަނަ އަހަރު ސާބިތު މައްސަލަތަކުގައި ކުރި އަށް އަހަރު ދުވަުގެ ޖަލު ހުކުމެއްގައެވެ. މި މައްސަލަ ހައި ކޯޓުގައި ޒިޔަތުގެ ފަރާތުން ސުޕްރީމް ކޯޓުގައި އިސްތިއުނާފުކުރި ނަމަވެސް އެ މައްސަލަ އަނބުރާ ގެންދިއުމަށް ޒިޔަތު ވަނީ ކޯޓުގައި އެދިފައެވެ.