މޯލްޑިވްސް ވަރޗުއަލް ޓުއަރގެ އޮފިޝިއަލް ޕާޓްނަރަކަށް އެމްއެމްޕީއާރުސީ ހަމަޖައްސައިފި

މޯލްޑިވްސް ވަރޗުއަލް ޓުއަރގެ އޮފިޝިއަލް ޕާޓްނަރަކަށް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީ ހަމަޖައްސައިފިއެވެ.

މޯލްޑިވްސް ވަރޗުއަލް ޓުއަރއަކީ ފަތުރުވެރިންނަށް ރާއްޖޭގެ ރީތި މަންޒަރުތައް ފެންނާނެފަދަ ގޮތަކަށް އެމީހުންނަށް ރާއްޖޭގެ ރީތި މަންޒަރުތައް ވަރޗުއަލްކޮށް ފެންނާނެ އިންތިޒާމް ހަމަޖެއްސުމުގެ ގޮތުން ބާއްވާ ހަރަކާތެކެވެ. މޯލްޑިވްސް ވަރޗުއަލް ޓުއަރ މެދުވެރިކޮށް ރާއްޖޭގެ 150 ރަށެއްގެ 2000 ވަރޗުއަލް ޓުއަރ ހަދާނެއެވެ.

advertisement

ވަރޗުއަލްކޮށް ރާއްޖެ އިޝްތިހާރުކުރުމަށް އޯރކާ މީޑިއާ ގްރޫޕުން ކުރިއަށްގެންދާ މޯލްޑިވްސް ވަރޗުއަލް ޓުއަރ އަންނަ އަހަރު އެއްކޮށް ނިންމާލުމަށް ވަނީ އަމާޒުހިފާފައެވެ. ކޯވިޑް-19ގެ ސަބަބުން މުޅި ދުނިޔޭގައި ފަތުރުވެރިކަން ހުއްޓި ފަތުރުވެރިކަން މާކެޓްކުރުމަށް ކުރިއަށްގެންދާ ގިނަ ހަރަކާތްތަކެއްވެސް ވަނީ ހުއްޓިފައެވެ. ރާއްޖޭގެ އިޤްތިޞާދުގެ ބޮޑުބައެއް ފަތުރުވެރިކަމަށް ބަރޯސާވެފައިވާއިރު މިދަނޑިވަޅުގައި ރާއްޖެ އިޝްތިހާރު ކުރެވޭނެ އެންމެ ރަނގަޅުއެއްގޮތަކީ ވަރޗުއަލްކޮށްކަމާއި މިއީ މުސްތަގުބަލުގައި މަޤްބޫލު ގޮތަކަށް ވެގެންދާނެކަމަށް އޯރކާ މީޑީއާއިން ބުނެއެވެ.

މޯލްޑިވްސް ވަރޗުއަލް ޓުއަރގެ މެއިން ޕާޓްނަރަކަށް ހަމަޖައްސާފައިވަނީ އުރީދޫ މޯލްޑިވްސްއެވެ. އަދި ސީޕްލޭން ޕާޓްނަރަކަށް ހަމަޖައްސާފައިވަނީ ޓީއެމްއޭއެވެ.

ވާޗުއަލްކޮށް ރާއްޖެ އިޝްތިހާރުކުރާއިރު ބޭނުންކުރާ ފޮޓޯއާއި ވީޑީއޯތައް ނަގާފައިވާގޮތުން، ދުނިޔޭގެ ކޮންމެ ތަނެއްގައި ހުރިނަމަވެސް އެ ރިސޯޓެއް ނުވަތަ ގެސްޓްހައުސްއެއްގެ މަންޒަރުތައް ބަލާލުމުގެ ފުރުޞަތު ލިބިގެންދާނެއެވެ.

މޯލްޑިވްސް ވަރޗުއަލް ޓުއަރ އެކްސްޕޯ ބާއްވަނީ ފަތުރުވެރިން ރާއްޖެ އައުމުގެ ކުރިން އެމީހުންނަށް ރާއްޖޭގެ ރީތި މަންޒަރުތައް ދައްކާލުމުގެ ބޭނުމުގައެވެ. މި ފެއަރ މެދުވެރިކޮށް ރާއްޖެއާބެހޭ ގިނަ މަޢުލޫމާތުތަކެއް އެއް ޕްލެޓްފޯމަކުން ބަލާލުމުގެ ފުރުސަތު ފަތުރުވެރިންނަށް ލިބިގެންދާނެކަމަށް އިވެންޓް އިންތިޒާމްކުރާ އޯރކާ މީޑިއާއިން ބުނެއެވެ.