ކުރިން ވިސާ ނަގަންޖެހޭ ގޮތަށް ޖެނުއަރީ މަހު ލަންކާ ހުޅުވާލަނީ

ކުރިޔާލާ ވިސާ ނަގަންޖެހޭ ގޮތަށް ލަންކާގެ ބައިނަލްއަގުވާމީ އެއާޕޯޓް ހުޅުވައިލުމަށް އެ ގައުމުން ނިންމައިފިއެވެ.

ލަންކާގެ ޓުއަރިޒަމް ޑިވެލޮޕްމަންޓް އޮތޯރިޓީ އާންމުކޮށްފައިވާ އުސޫލްތަކުގެ ދަށުން ބަންޑާރަނައިކަ އިންޓަނޭޝަނަލް އެއާޕޯޓް ހުޅުވުމަށް ނިންމާފައި ވަނީ ޖެނުއަރީ މަހުއެވެ. މި އުސޫލުގައިވާ ގޮތުން އެ ގައުމަށް ޒިޔާރަތްކުރާ ކޮންމެ މީހަކު ވެސް 14 ދުވަހަށް ކަރަންޓީން ވާންޖެހެއެވެ. ބައެއް ގައުމުތަކުން ކަރަންޓީންވާ މުއްދަތު މަދުކުރަމުން ދިޔަ ނަމަވެސް ލަންކާގައި އަދި ބަދަލެއް ގެނެސްފައެއް ނުވެއެވެ.

advertisement

މީގެ ކުރިން ލަންކާ އިން އޮން އެރައިވަލް ވިސާ ދޫކުރި ނަމަވެސް ޖެނުއަރީގައި ފުރަތަމަ ހުޅުވާލާއިރު އެ ގޮތަށް ވިސާ ދިނުމަށް ނިންމާފައެއް ނުވެއެވެ. އޭގެ ބަދަލުގައި އޮންލައިން މެދުވެރިކޮށް ކުރިއާލާ ވިސާ ހައްދަންޖެހޭ އިރު ހަ މަސް ދުވަހުގެ ޓުއަރިސްޓް ވިސާ ދޫކުރުމަށް ވަނީ ނިންމާފައެވެ.

ލަންކާގެ އެއާޕޯޓް ހުޅުވާލުމަށް ނިންމާފައި ވީ ނަމަވެސް އެ ގައުމަށް ދަތުރުކުރާ ފަރާތްތަކުން އަމަލުކުރަންޖެހޭ އުސޫލްތަކެއް ވަކީ ކަނޑައަޅާފައެވެ. އެ ގޮތުން ކޮވިޑަށް އިންޝުއަރކުރަންޖެހުމާއި ޕަބްލިކް ޓްރާންސްޕޯޓް ބޭނުން ނުކުރުން ހިމެނެއެވެ. އަދި ޕޮޒިޓިވް ވެއްޖެ ހާލަތެއްގައި ކަރަންޓީނާއި ހުރިހާ ހަރަދެއް ކުރަންޖެހޭނީ އަމިއްލައަށެވެ. އަދި ޓުއަރިސްޓުންނަށް މި ވަގުތު ހުޅުވާލުމަށް ހަމަޖައްސާފައި ވަނީ ވެސް ވަކި ހޮޓާތަކެކެވެ. އެ ގޮތުން ޓުއަރިސްޓުންނަށް ގޮސް ތިބެވޭނީ ލަންކާ ސަރުކާރުން ކަނޑައަޅާ ވަކި ހޮޓާތަކެއްގައެވެ.

ކޮވިޑް-19 ފެތުރެން ފެށުމާ ގުޅިގެން މާޗް މަހު ލަންކާ ބަންދުކުރުމަަށް ފަހު އޯގަސްޓް މަހުގެ ތެރޭގައި އެ ގައުމު ޓުއަރިސްޓުންނަށް ހުޅުވައިލުމަށް ނިންމިއެވެ. އަދި ކޮވިޑުން ރައްކާތެރި ތަނެއްގެ ގޮތިގައި ލަންކާ އިން ވަރަށް ބޮޑަށް އިސްތިހާރު ވެސް ކުރިއެވެ. ނަމަވެސް ކޮވިޑްގެ ދެ ވަނަ ރާޅަކާ އެކު އެ ގައުމުން ވަނީ އެ ނިންމުން ބަދަލުކޮށްފައެވެ.

ލަންކާގައި ދެ ވަނަ ފަހަރަށް ކޮވިޑް ކޭސްތައް މައްޗަށް ދާން ފެށީ އޮކްޓޫބަރު މަހުގެ ތެރޭގައެވެ. އެ ގައުމުން ކޮވިޑް ޖެހިގެން މިހާތަނަށް 124 މީހަކު މަރުވެފައި ވެއެވެ.