ގުޅުމެއް ނެތް ކޭސްތައް އެއް ޕަސެންޓަށް ވުރެ ދަށަށް!

ރާއްޖޭގައި ކޮވިޑް-19 އަށް ޕޮޒިޓިވްވާ މީހުންނާ ގުޅުމެއް ނެތް ކޭސްތައް އެއް ޕަސެންޓަށް ވުރެ ދަށްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ތަފާސް ހިސާބަށް ބަލާއިރު ފާއިތުވި މަހުގެ ފަހު ދެ ހަފުތާގައި ޕޮޒިޓިވްވި މީހުންގެ އަދަދަށް ބަލާއިރު ގުޅުމެއް ނެތް ކޭސްތަކުގެ އަދަދު ވަނީ 19 މީހުންނަށް ދަށްވެފައެވެ. މިއީ އެއް ވަނަ ލެވެލް އެލާޓް އަށް ވުރެ ދަށް އަދަދެކެވެ.

advertisement

ކޮމިއުނިޓީ ސްޕްރެޑް ފެތުރޭ މިންވަރު ބަލަނީ ގުޅުމެއް ނެތް ކޭސްތަކުގެ އަދަދާއި ނިސްބަތަށް ބަލައިގެންނެވެ. މީގެ އިތުރުން ފްލޫ ކްލިނިކްތަކުން ޕޮޒިޓިވްވާ އަދަދަށް ވެސް ބަލައެވެ.

ގުޅުން ނެތް ކޭސްތައް މަދުވި ނަމަވެސް ފްލޫ ކްލިނިކްތަކުން ޕޮޒިޓިވްވާ އަދަދު މިދިޔަ މަހުގެ ތެރޭގައި މައްޗަށް ގޮސްފައި ވެއެވެ.

ފާއިތުވި ދުވަސްތަކަށް ބަލާއިރު ކޮވިޑް އަށް ޕޮޒިޓިވްވި މީހުންގެ އަދަދު އުޅެނީ 50 އިން ދަށުގައެވެ. އެ ގޮތުން ބުރާސްފަތި ދުވަހު ޕޮޒިޓިވްވީ 36 މީހުންނެވެ. އޭގެ ކުރީ ދުވަހު 21 މީހުން ޕޮޒިޓިވްވި އިރު އަންގާރަ ދުވަހު ޕޮޒިޓިވްވީ 38 މީހުންނެވެ.

ރާއްޖޭގައި ޕޮޒިޓިވްވާ އަދަދު ދަށަށް ދާންފެށުމުން އެޗްޕީއޭ އިން ވަނީ ބައެއް ލުއިތައް ދޭން ފަށާފައެވެ. އެ ގޮތުން ދަތުރުތަކަށް ފަހު ކަރަންޓީން ވާންޖެހޭ މުއްދަތު 14 ދުވަހުން 10 ދުވަހަށް ވަނީ ކުރުކޮށްފައެވެ. އަދަދުތައް ދަށްވި ނަމަވެސް ރައްކާތެރިކަމުގެ ފިޔަވަޅުތައް ދޫކޮށްނުލުމަށް އެޗްޕީއޭ އިން ވަނީ އިލްތިމާސްކޮށްފައެވެ.

ޓުއަރިޒަމްގެ ގިނަ ހިދުމަތްތަކެއް މިހާރު ހުޅުވާލާފައިވީ ނަމަވެސް މާލެ ސަރަހައްދުގެ ގެސްޓްހައުސްތައް ހުޅުވާލުމަށް އެންމެ ބޮޑު ހުރަހަކަށްވެފައި ވަނީ ގުޅުމެއް ނެތް ކޭސްތައް އަދިވެސް އެކަށިގެންވާ ވަރަށް ދަށަށް ނުދިއުމެވެ. ނަމަވެސް ޓުއަރިޒަމް މިނިސްޓްރީން ބުނެފައި ވަނީ މި މަހުގެ ތެރޭގައި ހުޅުވާލެވޭނެކަމުގެ އުންމީދު ބޮޑު ކަމަށެވެ.