މެދުއިރުމަތީގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ހާއްސަ ހަރަކާތެއް ފަށައިފި

ދިވެހިރާއްޖެ މެދުއިރުމަތީގައި އިޝްތިހާރުކުރުމަށްޓަކައި ވިޒިޓް މޯލްޑިވްސް އާއި ޒޮމާޓޯ ގުޅިގެން ޑިޖިޓަލް ޕްރޮމޯޝަން ކެންޕެއިނެއް ފަށައިފިއެވެ. މިއީ ރާއްޖޭގެ ބޯޑަރު އަލުން ހުޅުވައިލުމާއި އެކު “ރީޑިސްކަވަރ މޯލްޑިވްސް…ދަ ސަނީ ސައިޑް އޮފް ލައިފް” ގެ ނަމުގައި ކުރިޔަށްގެންދާ ކެމްޕެއިންގެ ތެރެއިން ހިމެނިގެންވާ ޕްރޮމޯޝަންއެކެވެ.
މި ޕްރޮމޯޝަންގެ މަޤްސަދަކީ ޒޮމާޓޯގެ ޕްލެޓްފޯމް ބޭނުން ކުރާ ފަރާތްތައް މެދުވެރިކޮށް ޑިޖިޓަލް އަދި މީސް މީޑިއާގެ ވަސީލަތްތަކުން ދިވެހި ރާއްޖޭގެ މައުލޫމާތު ފޯރުކޮށްދީ ރާއްޖެ އިޝްތިހާރު ކުރުމެވެ. މި ޕްރޮމޯޝަން ކުރިއަށްދާނީ ދެ ހަފްތާއަށްކަމަށް އެމްއެމްޕީއާރުސީން ބުނެއެވެ.

ޒޮމާޓޯގެ ޕްލެޓްފޯމް ގެ “އޯޑަރ އެންޑް ވިން” ކެމްޕެއިނެއް މެދުވެރިކޮށް އެންމެ ގިނައިން އޯޑަރުކުރާ ފަރާތަކަށް ދިވެހި ރާއްޖެއަށް ހިލޭ ދަތުރެއް ލިބުމުގެ ފުރުސަތުވެސް މި ކެންޕެއިންގެ ތެރެއިން ވަނީ ހުޅުވާލާފައެވެ.
މީގެ ބާރަ އަހަރު ކުރިން އިންޑިއާގެ ދެލީ އިން އުފެދުނު ޒޮމާޓޯ އަކީ ރެސްޓޯރެންޓްތަކާއި ގުޅިގެން ކައެއްޗެހީގެ މަޢުލޫމާތު ފޯރުކޮށްދީ އަދި ޑެލިވަރީގެ ހިދުމަތް ދެމުންދާ ކުންފުންޏެކެވެ. މި ކުންފުންޏަކީ މެދުއިރުމަތީގެ ގައުމުތަކުގައި ވަރަށް މައްޝޫރު ކުންފުންޏެކެވެ. އަދި މިހާރު ޒޮމާޓޯ އަކީ މި އުސޫލުން ކާބޯތަކެތި ވިއްކަމުންދާ ދުނިޔޭގައިވާ އެންމެ ބޮޑު އެއް ކުންފުންޏެވެ. މިގޮތުން ޒޮމާޓޯގެ ޕްލެޓްފޯމް 24 ގައުމެއްގަ އާއި 10،000 އަށް ވުރެ ގިނަ ސިޓީގައި 500،000 އަށް ވުރެ ގިނަ ފަރާތަކުން ދަނީ ބޭނުން ކުރަމުންނެވެ. އަދި މި ޑިޖިޓަލް ކެމްޕެއިން އިން ފޯރުކޮށްދެވޭނެ ޖުމްލަ “އިމްޕްރެޝަންސް” ގެ އަދަދު 3.4 މިލިޔަނަށްވުނެ ގިނަވެގެން ދާނެކަމަށް އެމްއެމްޕީޢާރުސީން ބުނެއެވެ.
ދުނިޔޭގެ އެކި ކަންކޮޅުތަކުން ދަތުރުފަތުރު ކުރުމަށް އަލުން ހުޅުވައިލެވިގެން ދާއިރު ދިވެހިރައްޖެ ޤުދުރަތީ ގޮތުން ވަކި ރަށްތަކެއްގެ އުފެދިފައި އޮންނަ އޮތުން ވެގެން ދަނީ ކޮވިޑް-19ގެ ދުވަސްކޮޅުގައި ފަތުރުވެރީންނަށް ލިބިގެންދާނެ އިތުރު ރައްކާތެރިކަމަކަށެވެ. މީގެއިތުރުން ދިވެހި ރާއްޖޭގެ ފަތުރުވެރިކަމުގެ ސިނާޢަތުގައި އުޅުއްވާ ބޭފުޅުން އަދާކޮށްފައިވާ ބުރަ މަސްޢޫލިއްޔަތުގެ ނަތީޖާއެއްގެ ގޮތުން ދިވެހި ރާއްޖެއަށް ވަނީ ދުނިޔޭގެ ފަތުރުވެރިކަމުގެ ދާއިރާއިން ރަންވަނަ ތަކެއް ލިބިފައެވެ. މި ވަނަތައްވެސް ވެގެން ދިޔައީ ދިވެހި
ރާއްޖެއަށް ޒިޔާރަތްކުރުމަށް ފަތުރުވެރީންނަށް ހުޅުވައިލެވިގެންދާ އިތުރު ދޮރަކަށްކަމަށް އެމްއެމްޕީއާރުސީން ފާހަގަކުރެއެވެ.

advertisement

މި އަހަރުގެ މިހާތަނަށް ވިޒިޓް މޯލްޑިވްސްއިން ވަނީ ދިވެހިރާއްޖެ އިޝްތިހާރުކުރުމަށް 22 މާކެޓެއްގައި 412 އަށް ވުރެ ގިނަ ހަރަކާތް ހިންގާފަ އެވެ. މީގެތެރެއިން 314 ހަރަކާތެއް (އޮންލައިން އަދި އޮފްލައިން) ކުރިއަށް ގެންގޮސްފައިވަނީ ކޮވިޑްގެ ކާރިސާގެ ތެރޭގައެވެ. އޭގެ ތެރޭގައި ފެއާތަކުގައި ބައިވެރިވުމާއި، ވެބިނާ، ފެމް ޓްރިޕްސް، އޮންލައިން ރޯޑް ޝޯ، އައުޓްޑޯ ކެމްޕެއިން އަދި ޑިޖިޓަލް ކެމްޕެއިންތައް ވެސް ހިމެނެ އެވެ. މީގެ ތެރޭގައި ޗައިނާގައި ކުރިޔަށް ގެންދަމުންދާ އޮންލައިން ރޯޑް ޝޯގެ އިތުރުން ސީ.އެން.އެން އަދި ސްކައިސްކޭނަރ އާއި އެކު ކުރިޔަށް ގެންދަމުންދާ ގްލޯބަލް ކެމްޕޭންތައް ފާހަގަ ކޮށްލެވެ އެވެ. ހަމަ އެހެންމެ ދިވެހިރައްޖޭގައި ތަޢާރަފް ކުރެވުނު ބޯޑަރ މައިލްސް ޕްރޮގްރާމް އަދި އެލައިޑް އިންޝުއަރެންސް އިން ތައާރަފް ކޮށްފައިވާ “އެލައިޑް އިންބައުންޑް” އިންޝުއަރެންސް އަކީ ދިވެހިރައްޖެއަށް ފަތުރުވެރިން ޒިޔާރަތް ކުރުމަށް ލިބޭ އިތުރު ހިތްވަރެއްކަމަށް އެމްއެމްޕީއާރުސީން ދެކެއެވެ.