މިމަހުގެ ފުރަތަމަ ހަފްތާގައި ގިނަ އަދަދެއްގެ ފަތުރުވެރިން ރާއްޖެ އައިސްފި

މިމަހުގެ ފުރަތަމަ ހަފްތާގައި ރާއްޖެއަށް 14000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖެއަށް އަންނަ ފަތުރުވެރިންގެ އަދަދު މިހާރު އަންނަނީ އިތުރުވަމުންނެވެ. އެ މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކަގޮތުން މިމަހުގެ އެކަކުން ހަތެއްގެ ނިޔަލަށް ރާއްޖެ ޒިޔާރަތްކުރި ފަތުރުވެރިންގެ ޖުމްލަ އަކީ 14,296 އެވެ. އެއީ އެވްރެޖުކޮށް ދުވާލެއްގެ މައްޗަށް 2,042 ފަތުރުވެރިންނެވެ.

advertisement

ޓޫރިޒަމްގެ ތަފާސް ހިސާބުތައް ދައްކާގޮތުން މި ޑިސެމްބަރު މަހުގެ ތެރޭގައި އެންމެ ގިނަ ޓޫރިސްޓުން އައިސްފައިވަނީ މިމަހުގެ ހަވަނަ ދުވަހުއެވެ. އެ ދުވަހު 3,006 ޓޫރިސްޓުން އައިސްފައިވެއެވެ. މިއީ ކޮވިޑުގެ ބަލިމަޑުކަމާހުރެ ބޯޑަރުތައް ބަންދުކުރުމަށްފަހު އަލުން ހުޅުވާލިފަހުން އެންމެ ގިނަ ފަތުރުވެރިން އައި ދުވަސްވެސްމެއެވެ.

ސަރުކާރުން އަމާޒު ހިފާފައި އޮތީ މިމަހުގެ 16 ވަނަ ދުވަހުގެ ކުރިން 100،000 ޓޫރިސްޓުން ގެނައުމަށެވެ. އަދި މިމަހުގެ 25 ގެ ކުރިން މިއަހަރު ރާއްޖެއަށް ޒިޔާރަތްކުރި ޖުމްލަ ފަތުރުވެރިންގެ އަދަދު 500،000 އަށް އެރުވުމަށްވެސް އެ މިނިސްޓްރީން ވަނީ އަމާޒު ކަނޑައަޅާފައެވެ.

ޓޫރިޒަމްގެ ތަފާސް ހިސާބުތަކަށް ބަލާއިރު މިހާރު އެންމެ ގިނަ ފަތުރުވެރިން ރާއްޖެ އަންނަނީ ރަޝިއާއިންނެވެ. ބޯޑަރު ހުޅުވާލިފަހުން ރަޝިއާ އިން އައި ފަތުރުވެރިންގެ ޖުމްލަ އަކީ 19،883 އެވެ. ދެވަނަ އަށް އެންމެ ގިނަ ޓޫރިސްޓުން އައިސްފައިވަނީ އިންޑިއާ އިންނެވެ. އިންޑިއާ އިން އައި ޓޫރިސްތުންގެ ޖުމްލަ އަކީ 12،615 އެވެ. ތިންވަނަ އަށް އެންމެ ގިނަ ޓޫރިސްތުން އައި އިނގިރޭސިވިލާތުން 7،416 ޓޫރިސްޓުން އައިސްފައިވެއެވެ.