ބަލިމަޑުކަމެއްގެ ތެރޭގައި ޤައުމު އޮތް ޙާލަތެއްގައި ނާޖާއިޒު މަންފާ ހޯދާ ނަމަ ޖަވާބުދާރީވާންޖެހޭނެ: ޝިއުނާ

ސިއްހީ ބަލިމަޑުކަމެއްގެ ތެރޭގައި ޤައުމު އޮތް ޙާލަތެއްގައި ރައްޔިތުންގެ ފައިސާއިން ނާޖާއިޒު މަންފާ ހޯދާ ނަމަ ޖަވާބުދާރީވާންޖެހޭނެ ކަމަށް އޭސީސީގެ ރައީސް މަރްޔަމް ޝިއުނާ ވިދާޅުވެއްޖެއެވެ.

ބައިނަލްއަޤުވާމީ އެންޓި-ކޮރަޕްޝަން ދުވަހުގެ މުނާސަބަތުގައި ދެއްވި ޚިޠާބުގައި އޭސީސީގެ ރައީސް ވިދާޅުވީ، ސިއްހީ ނިޒާމަށް އެކަށީގެންނުވާ މިންވަރަށް މުޖުތަމައުގެ އާންމު ޙާލަތު ގޮސްދާނެކަމުގެ ބިރުއޮތް މިފަދަ ދަނޑިވަޅެއްގައި ވެސް، ޤައުމުތަކުގެ ކޮރަޕްޝަނުގެ ޙާލަތު އިތުރަށް ގޯސްވަމުންދާ ކަމަށާއި، މިފަދަ ޙާލަތެއްގައި އިމަރޖެންސީ ޕްރޮކިއުމަންޓް ޕްރޮސެސްއަކަށް ދާންޖެހުމަކީ ވެސް ކޮރަޕްޝަނަށް ހުޅުވިގެންދާ އިތުރު ފުރުޞަތެއް ކަމަށެވެ.

advertisement

ޝިއުނާ ވިދާޅުވީ ކޮވިޑް19ގެ ޙާލަތުގައި ދައުލަތުގެ އިދާރާތަކުން ތަކެއްޗާއި ޚިދުމަތް ހޯދުމާ ގުޅޭ ގޮތުން އޭސީސީއަށް 34 ޝަކުވާއެއް ހުށަހެޅިފައިވާ ކަމަށެވެ. މިފަދަ ހާލަތެއްގައި ނާޖާއިޒް މަންފާ ހޯދާ ފަރާތްތަކުން ރައްޔިތުންނަށް ޖަވާބުދާރީވާން ޖެހޭނެކަން ޒިންމާދާރު މަޤާމުތަކުގައި ތިބި ފަރާތްތަކުން ވިސްނަން ޖެހޭނެ ކަމަށް ވެސް ޝިއުނާ ވިދާޅުވިއެވެ.

 އޭސީސީގެ އަމާޒަކީ، ރައްޔިތުންގެ ފައިސާއިން ނާޖާއިޒު މަންފާ ހޯދާ ފަރާތްތަކާ މެދު، މަޤާމަށް ނުވަތަ ނިސްބަތްވާ ޕާޓީއަށް ބެލުމެއް ނެތި ޤާނޫނީ އޮނިގަނޑުގެ ތެރެއިން ފިޔަވަޅު އެޅުން ކަމަށެވެ.