މަސްތުވާތަކެތީގެ ބޮޑެއް ކަމަށް ބެލެވޭ ޝަހީބް ބަންދުގައި ބަހައްޓަށް ސުޕްރީމް ކޯޓުން ތާއީދުކޮށްފި

ރާއްޖެ އަށް ގިނަ އަދަދެއްގެ މަސްތުވާތަކެތި އެތެރެކުރި ކަމުގެ ތުހުމަތުކުރެވޭ ގއ. ލައިޓްހައުސް ޝަހީބް އިބްރާހީމް ޝަރީއަތް ނިމެންދެން ބަންދުގައި ބެހެއްޓުމަށް ހައި ކޯޓުން ކުރި އަމުރު ސުޕްރީމް ކޯޓުން ދަމަހައްޓައިފިއެވެ.

ޕީޕީއެމްގެ ކައުންސިލް މެންބަރަކަށް ހުރި އުމުރުން 42 އަހަރުގެ ޝަހީބް ހައްޔަރުކުރީ ހުޅުމާލޭ ފަޅުތެރޭގައި އޮތް ދޯންޏަކުން 130 ކިލޯގެ މަސްތުވާތަކެއްޗާ އެކު މީހުން ހައްޔަރުކުރުމުގެ ތެރޭގައެވެ. ފުލުހުން ހައްޔަރުކުރުމުން ޝަރުތުތަކަކާ އެކު އޭނާ ބަންދުން ދޫކޮށްލީ ކްރިމިނަލް ކޯޓުންނެވެ. ނަމަވެސް ޕްރޮސެކިއުޓާ ޖެނެރަލް އެ މައްސަލަ ހައި ކޯޓުގައި އިސްތިއުނާފްކުރެއްވުމުން ހައި ކޯޓުން ވަނީ ޝަރީއަތް ނިމެންދެން އޭނާ ބަންދުގައި ބެހެއްޓުމަށް އަމުރު ކޮށްފައެވެ. އެ މައްސަލަ އޭނާގެ ފަރާތުން ސުޕްރީމް ކޯޓުގައި އިސްތިއުނާފްކުރުމުން އެ ކޯޓުން ވަނީ ހައި ކޯޓުގެ އަމުރު ދަމަހައްޓާފައެވެ.

advertisement

މި މައްސަލާގައި އިތުރު ބަޔަކު ވެސް ހިމެނޭ އިރު ފުލުހުން ހިންގި އޮޕަރޭޝަންގައި ހަތް މީހަކު ހައްޔަރުކޮށްފައި ވެއެވެ.

ޝަހީބަކީ މީގެ ކުރިން 2019 ވަނަ އަހަރު ރާއްޖެ އަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ހިފެހެއްޓި އީރާންގެ ބޯޓުގެ މައްސަލައެއްގައި ވެސް ހިމެނޭ މީހެކެވެ. އެ ބޯޓު ހިފަހައްޓައި އެ ބޯޓުން ހައްޔަރުކުރި ހަތް މީހުންނަށް ޖާމިނުވެފައި ވަނީ ވެސް ޝަހީބެވެ. ނަމަވެސް ކްރިމިނަލް ކޯޓުން ޝަހީބާއި އެ މީހުން ވެސް ވަނީ ދޫކޮށްލާފައެވެ. އެ ބޯޓުން ފަހުން ކ. ހިއްމަފުއްޓަށް އެހެލައި މަރާމާތުކުރަމުން ދާކަމުގެ ތުހުމަތު ފުލުހުން ކޮށްފައި ވެއެވެ. އެ ބޯޓު ފުލުހުންގެ ބެލުމުގެ ދަށުން ދޫކޮށްލުމުން ފުރުވައިލުމުގެ އެޖެންޓެއްގެ ގޮތުގައި ހަވާލުވީ ވެސް ޝަހީބެވެ. އެހެން ނަމަވެސް އެ ބޯޓު ފެތުނު ކަމަށް ބުނެ އޮޅުވާލައި ބޭނުންކުރާ މައްސަލަ ވެސް ފުލުހުން އަންނަނީ ބަލަމުންނެވެ.