ގަލްފް އެއަރއިން ރާއްޖެއަށް ފަށަން ތައްޔާރުވާ ދަތުރުތަކުގެ ޑިމާންޑް ބޮޑުވެއްޖެ

ބަހްރެއިންގެ ޤައުމީ އެއަރލައިން، ގަލްފް އެއަރއިން ރާއްޖެއަށް ފެށުމަށް ހަމަޖެހިފައިވާ ދަތުރުތަކަށް ބޮޑު ތަރުހީބެއް ލިބެމުންދާކަމަށް އެ އެއަރލައިނުން ހާމަކޮށްފިއެވެ.
ގަލްފް އެއަރއިން ބުނީ ރާއްޖެއަށް އޮތް ޑިމާންޑް ބޮޑުވުމުގެ ސަބަބުން ރާއްޖެއަށް ކުރާ ދަތުރުތަކުގައި ބޭނުންކުރާ މަތިންދާބޯޓު ބޮޑުކޮށްފައިވާކަމަށެވެ.  

ގަލްފް އެއަރއިން ރާއްޖެއަށް ދަތުރުތައް ފެށުމަށް ހަމަޖެހިފައިވަނީ މިމަހުގެ 12 ވަނަ ދުވަހުއެވެ. ގަލްފް އެއަރއިން ވަނީ ހަފްތާއަކު 2 ދަތުރު ރާއްޖެއަށް ބޭއްވުމަށް ނިންމާފައެވެ. މި ދަތުރުތައް ކުރާނީ ބަހްރެއިން އިންޓަނޭޝަނަލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ.
ގަލްފް އެއަރއިން އެންމެ ފުރަތަމަ ރާއްޖެއަށް ދަތުރުތައް ފަށާފައިވަނީ މިދިޔަ އަހަރުގެ އޮކްޓޫބަރުމަހުގެ 27 ވަނަ ދުވަހުއެވެ. އޭރު އެ އެއަރލައިނުން ދިޔައީ ހަފްތާއަކު 5 ދަތުރު ރާއްޖެއަށް ބާއްވަމުންނެވެ. ކޯވިޑް19 އާއި ގުޅިގެން ރާއްޖޭގެ ބޯޑަރުތައް ބަންދުކޮށްފައި އޮތުމަށްފަހު މިދިޔަ ޖުލައިމަހުގެ 15 ވަނަ ދުވަހު ވަނީ ފަތުރުވެރިންނަށް ރާއްޖޭގެ ބޯޑަރުތައް އަލުން ހުޅުވާލާފައެވެ. މިއާއެކު ބައިނަލްއަޤްވާމީ އެއަރލައިންތަކުން ދަނީ ރާއްޖެއަށް ދަތުރުތައް ފަށަމުންނެވެ ގަލްފް އެއަރއިން މިހާރުވެސް ދަނީ މެދު އިރުމަތީގެ ގިނަ ޤައުމުތަކަކަށް ދަތުރުތައް ބާއްވަމުންނެވެ. އަދި ޔޫރަޕްގެ ބައެއް ޤައުމުތަކަށްވެސް މިހާރު ދަތުރުތައް ފަށާފައިވާއިރު، އިންޑިއާ އަދި ޕާކިސްތާންގެ ބައެއް ސިޓީތަކަށް ގަލްފް އެއަރގެ ދަތުރުތައް ވަނީ އަލުން ފަށާފައެވެ.

advertisement