ފަތުރުވެރިންނަށް ހިދުމަތް ދޭ ގެސްޓްހައުސްތަކުން ދިވެހިންނަށް ހިދުމަތް ދިނުން މަނާ!

މާލެ ސަރަހައްދުގެ ގެސްޓްހައުސްތަކަށް ހުއްދަ ދިނުމަށް ހަމަޖައްސާފައި ވަނީ ޝަރުތުތަކަކާ އެކުގައި ކަމަށާއި އެ ގޮތުން ބޭރުގެ ފަތުރުވެރިންނަށް ހިދުމަތް ދޭ ހިސާބުން ދިވެހިންނަށް ނުވަތަ މާލޭގައި ދިރިއުޅޭ މީހުންނަށް އެތަނަކުން ހިދުމަތް ނުދެވޭނެ ކަމަށް ޓުއަރިޒަމް މިނިސްޓްރީން ބުނެފިއެވެ.

ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން ޓުއަރިޒަމް މިނިސްޓްރީގެ ސީނިއާ އެގްޒެކެޓިވް ޑިރެކްޓަރ އަލީ ރައްޒާން ވިދާޅުވެފައި ވަނީ މިހާރު ގައިޑްލައިންތައް ހެދިފައިވާ ގޮތަށް ބަލާއިރު ފަތުރުވެރިންނަށް ހިދުމަތް ދޭ ނަމަ އެ ތަނެއް ހާއްސަ ވާނީ ފަތުރުވެރިންނަށް ކަމަށާއި އޮޕަރޭޓީންގ ލައިސަންސް އޮތް ނަމަވެސް މި ވަގުތު ހުއްދަ ލިބޭނީ ހާއްސަ ހުއްދައެއްގެ ދަށުން ކަމަށެވެ.

advertisement

ލޮކްޑައުންއާ ގުޅިގެން މާޗް މަހުގެ ތެރޭގައި ގެސްޓްހައުސްތައް ބަންދުކުރި ފަހުން މިހާތަނަށް ހުއްދަ ދީފައި ވަނީ މާލެ ފިޔަވައި އެހެން ރަށްރަށުގެ ގެސްޓްހައުސްތައް ހުޅުވުމަށެވެ. މާލެ ސަރަހައްދުގެ ގެސްޓްހައުސްތަކަށް ހުއްދަ ދިނުން ލަސްވެފައިވީ ނަމަވެސް ޓްރާންސިޓް ތަންތަނުގެ ގޮތުގައި ވަކި ޝަރުތުތަކަކާ އެކު ގެސްޓްހައުސްތަކުން އައީ ހިދުމަތް ދެމުންނެވެ. އަދި ރަސްމީކޮށް ނުހުޅުވި ނަމަވެސް ގެސްޓްހައުސްތަކުން ދިވެހިންނަށް ހިދުމަތް އަންނަނީ ދެމުންނެވެ. ނަމަވެސް ރަސްމީކޮށް ގެސްޓްހައުސްތައް ހުޅުވި ފަތުރުވެރިން އަންނަން ފެށުމުން އެތަންތަން ދިވެހިންނަށް ބަންދުވާނެއެވެ. ނުވަތަ ހަމައެކަނި ދިވެހިންނަށް ހާއްސަކޮށްގެން ހިދުމަތް ދިނުމުގެ ފުރުސަތު ލިބޭނެއެވެ.

ކޮވިޑް-19ގެ ސަބަބުން ޓުއަރިޒަމްގެ ދާއިރާ ވަރަށް ބޮޑަށް ހީނަރުވެފައި އޮތުމަށް ފަހު ރިސޯޓްތަކާއި ގެސްޓްހައުސްތައް ހުޅުވާލުމާ އެކު ގިނަ އަދަދެއްގެ ޓުއަރިސްޓުން ރާއްޖެ ވަނީ އަންނަން ފަށާފައެވެ. ޓުއަރިޒަމް މިނިސްޓްރީން ބުނީ ބަލިމަޑުކަމާ އެކު ވެސް މި އަހަރު ނިމޭ އިރު ރާއްޖެ އަންނަ ފަތުރުވެރިންގެ އަދަދު ފަސް ލައްކައަށް އަރާނެ ކަމަށެވެ. ރާއްޖެ ހުޅުވައިލި ފަހުން މިހާރު ވެސް އެއް ލައްކައަށް ވުރެ ގިނަ ފަތުވެރިން ވަނީ އައިސްފައެވެ.