5 ލައްކަ ފަތުރުވެރިން މިމަހުގެ 19 ގައި ރާއްޖެ އަންނާނެ – ޓޫރިޒަމް މިނިސްޓްރީ

ރާއްޖެއަށް ޒިޔާރަތްކުރާ ފަސް ލައްކަ ވަނަ ފަތުރުވެރިޔާ މިމަހުގެ 19 ވަނަ ދުވަހު ރާއްޖެ އަންނާނެ ކަމަށް ޓޫރިޒަމް މިނިސްޓްރީ އިން ބުނެފިއެވެ.

ޓޫރިޒަމް މިނިސްޓްރީގެ ސީނިއަރ އެގްޒެކިއުޓިވް އޮފިސަރ އަލީ ރައްޒާން ވިދާޅުވީ މިއަހަރަށް ސަރުކާރުން މިހާރު ޓާގެޓްކޮށްފައިވާ ފަތުރުވެރިންގެ އަދަދަކީ ފަސް ލައްކަ ކަމަށާއި، ބޯޑަރު ހުޅުވާލިފަހުން ރާއްޖެ އައި އެއްލައްކަ ވަނަ ފަތުރުވެރިޔާ ޑިސެމްބަރ 12 ވަނަ ދުވަހު ރާއްޖެ އައިސްފައިވާ އިރު، މުޅި އަހަރު ރާއްޖެ އައި ފަތުރުވެރިންގެ ތެރެއިން ފަސް ލައްކަ ވަނަ ފަތުރުވެރިޔާ ރާއްޖެ އަންނާނެ ކަމަށް ލަފާކުރެވެނީ ޑިސެމްބަރ 19 ވަނަ ދުވަހު ކަމަށެވެ.

advertisement

ރައްޒާން ވިދާޅުވީ ކޮވިޑް-19 ސަބަބުން ރާއްޖޭގެ ބޯޑަރު ބަންދުކޮށްފައި އަލުން ހުޅުވާލި އިރު، އެންމެ ފުރަތަމަ އަންދާޒާ ކުރެވުނީ ފަސް ލައްކަ ފަތުރުވެރިން ހަމަވާނީ ޑިސެމްބަރ 25ގެ ފަހުން ކަމަށެވެ. އެހެން ނަމަވެސް މިހާރު ރާއްޖެ އަންނަމުންދާ ފަތުރުވެރިންގެ އަދަދަށް ބަލައި ކުރިއަށް އޮތްތާގައި ވަރަށް އަވަހަށް ފަސް ލައްކަ ފަތުރުވެރިން ރާއްޖެ އަންނާނެ ކަމަށް ލަފާކުރެވޭ ކަމަށް ރައްޒާން ވިދާޅުވިއެވެ.

ރާއްޖެ އަންނަ ފަތުރުވެރިންގެ އަދަދަށް ބަލައި އަންނަ އަހަރު ރާއްޖެއަށް 1.5 މިލިއަން ފަތުރުވެރިން އަންނާނެކަމަށް މިހާރު ލަފަކުރެވޭކަމަށް ރައްޒާން ފާހަގަކުރެއްވިއެވެ.

ރާއްޖެ އަންނަ ފަތުރުވެރިންގެ އަދަދު ބޮޑުތަނުން އިތުރުވާންފަށާފައިމިވަނީ ރާއްޖޭގައި ކޯވިޑް19 ގެ ހާލަތު ރަނގަޅުވެ ބައިނަލްއަޤްވާމީ ގިނަ އެއަރލައިންތަކަކުން ރާއްޖެއަށް އަލުން ދަތުރުތައް ފަށާފައިވަނިކޮށްނެވެ. ގިނަ އެއަރލައިންތަކަކުން ދަތުރުތައް ފެށުމާއިއެކު މިހާރު ދުނިޔޭގެ އެކި ކަންކޮޅުތަކުން ރާއްޖެ އަންނަ ފަތުރުވެރިންގެ އަދަދުވެސް އަންނަނީ އިތުރުވަމުންނެވެ.