ެ2 ބްރާންޗެއް މިމަހުގެ 22 އިން ފެށިގެން ބަންދުކުރަނީ

ބޭންކް އޮފް މޯލްޑިވްސްގެ ބާޒާރު ބްރާންޗް އަދި އެއަރޕޯޓް ބްރާންޗް މިމަހުގެ 22 އިން ފެށިގެން ބަންދުކުރާނެކަމަށް އެ ބޭންކުން ބުނެފިއެވެ.

ބީއެމްއެލްއިން ބުނީ މި 2 ބްރާންޗް ބަންދުކުރުމަށް ނިންމީ ކޯވިޑް19 ގެ ސަބަބުން އެ ބޭންކުގެ ގިނަ ޙިދުމަތްތަކެއް އޮންލައިންކޮށް ލިބޭނެ އިންތިޒާމް ހަމަޖެހިފައިވުމާއެކު، ޙިދުމަތްތަކަށް ވަކިން ޙާއްސަ ބްރާންޗްތައް ކަނޑައެޅިފައި ހުރުމުގެ ސަބަބުންކަމަށެވެ.

ބީއެމްއެލްގެ ބާޒާރު ބްރާންޗް އަދި އެއަރޕޯޓް ބްރާންޗް ބަންދުކުރިނަމަވެސް، އެތަންތަނުގައި ހުރި އޭޓީއެމްގެ ޙިދުމަތް ލިބޭނެކަމަށް ބީއެމްއެލްއިން ބުނެއެވެ. އަދި އެއަރޕޯޓްގައި ދެމުންއަންނަ މަނީ އެކްސްޗޭންޖްގެ ޙިދުމަތްވެސް ކުރިއެކޭ އެއްގޮތަށް ފޯރުކޮށްދޭނެކަމަށް ބީއެމްއެލްއިން ބުނެއެވެ.

ބީއެމްއެލްއިން ވަނީ ދާދިފަހުން ކުރީގެ ސްޓަރ ސިނަމާ ހުރި އިމާރާތުގައި ލޯނުގެ އެކި ޙިދުމަތް ދިނުމަށްވެސް ވަކި ޙާއްސަ ބްރާންޗެއް ހުޅުވާފައެވެ.

މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 38 ބްރާންޗް، 64 ސެލްފް ސާވިސް ބޭންކިން ސެންޓަރު، 127 އޭޓީއެމް ބަހައްޓައި ބީއެމްއެލްއިން އަންނަނީ ރައްޔިތުންނަށް ޙިދުމަތް ފޯރުކޮށްދެމުންނެވެ.

advertisement