މާލޭގައި ފަޔަރ ހައިޑްރަންޓް ސިސްޓަމް ބެހެއްޓުމުގެ މަސައްކަތް ފަށައިފި

މާލޭގައި ފަޔަރ ހައިޑްރަންޓް ސިސްޓަމް ބެހެއްޓުމުގެ މަސައްކަތް ފަށައިފިއެވެ.

މި މަޝްރޫގެ މައިގަނޑު ބޭނުމަކީ މާލޭގައި ހިނގާ އަލިފާނުގެ ޙާދިސާތައް މަދުކޮށް އަލިފާން ނިއްވުމުގެ ޚިދުމަތް އިތުރަށް ފުޅާކޮށް އަލިފާނުގެ ޙާދިސާތަކުން ރައްކާތެރިވުމުގެ ފިޔަވަޅުތައް ދުރާލައި އެޅުމެވެ.
މިމަސައްކަތަކީ މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާންސްޓްރަކްޗަރއާއި އެމްޑަބްލިޔުއެސްސީއާއި އެމްއެންޑީއެފް ގުޅިގެން ކުރިއަށްގެންދާ މަޝްރޫޢެކެވެ.
މި މަޝްރުއުގެ އަމަލީ މަސައްކަތް ފަށާފައިވަނީ އމިމަހުގެ 13ވަނަ ދުވަހުއެވެ. މި މަޝްރޫޢުގެ ދަށުން މަޖީދީމަގުގައި ޖުމްލަ 12 ފަޔަރ ހައިޑްރަންޓް ބެހެއްޓުމަށްވަނީ ހަމަޖެހިފައިވެއެވެ. އޭގެތެރެއިން މިހާތަނަށް 3 ފަޔަރ ހައިޑްރަންޓް ބެހެއްޓުމުގެ މަސައްކަތް ވަނީ ނިމިފައެވެ. އެއީ މަޖީދީމަގު މާފަންނު މަދަރުސާކައިރިއާއި، މާފަންނު ސަހަރާ ކައިރީގެ އިތުރުން މަޖީދީމަގު ޝާޢިރުވާދީ ކައިރީ ހަރުކުރުމަށް ނިންމާފައިވާ ފަޔަރ ހައިޑްރެންޓްގެ މަސައްކަތެވެ.

އެމްއެންޑީއެފުން މަޢުލޫމާތު ދެއްވާ ގޮތުގައި މިމަޝްރޫޢުގެ މަސައްކަތް ތާވަލު ކުރެވިފައިވާގޮތަށް ކުރިއަށްދާނަމަ 2021ވަނަ އަހަރުގެ ޖެނުއަރީ މަހުގެ ފުރަތަމަ ހަފްތާގެ ތެރޭގައި ނިންމާލެވޭނެއެވެ.
މަސައްކަތް ކުރިޔަށްދާ ސައިޓް ސުޕަވައިޒްކުރުމާއި އިތުރު ބައެއް މަސައްކަތްތައް އެމްއެންޑީއެފްގެ ފަޔަރ އެންޑް ރެސްކިއުގެ ޓީމުން އަންނަނީ ކުރަމުންނެވެ. އެގޮތުން މި ޕްރޮޖެކްޓުގެ މަސައްކަތަށް ބޭނުންވާ ވަޞީލަތްތައް ފޯރުކޮށްދިނުމާއި ފެން ހިންދަންޖެހޭ ޙާލަތްތަކުގައި އެކަންވެސް ކުރަމުން އަންނަނީ ފަޔަރ އެންޑް ރެސްކިޔު ސަރވިސްއިން ކަމަށް އެމްއެންޑީއެފުން ވިދާޅުވެއެވެ.
މާލޭގައި މީގެކުރިން ހިނގާފައިވާ އަލިފާނުގެ ހާދިސާތަކުގައި ބޑެތި ގެއްލުންތަކެއް ލިބި ބައެއް މީހުންގެ ފުރާނަވެސް ވަނީ ގެއްލިފައެވެ. މާލޭގެ މަގުތަކަށް އަލިފާން ނިއްވުމަށް ބޭނުންކުރާ އުޅަނދުތައް ވެއްދުމަށް ވަނީ ދަތިތަކެއް ހުރިއިރު މިހާރު މި ބަހައްޓާ ފަޔަރ ހައިޑްރަންޓް ސިސްޓަމާއިއެކު މިކަމަށް ފަސޭހަތަކެއް ލިބިގެންދާނެއެވެ.

advertisement