އުރީދޫއިން މާލޭގެ ބޮޑު ސަރަހައްދަކަށް 5 ޖީ ނެޓްވޯރކް ތައާރަފްކޮށްފި

އުރީދޫ މޯލްޑިވްސްއިން 5ޖީ ނެޓްވޯރކް، މާލޭގެ ބޮޑު ސަރަހައްދަކަށް ތައާރަފްކޮށްފިއެވެ. މީގެ ތެރޭގައި ގިނަ ވިޔަފާރިތައް ހިންގާ ސަރަހައްދުތައް، ހޮސްޕިޓަލް އަދި އާންމު ސަރަހައްދުތައް ހިމަނާފައިވެއެވެ. 5ޖީ ނެޓްވާރކް އިފްތިތާޙް ކުރުމަށް ބޭއްވި ޚާއްޞަ ޙަފްލާ ގައި އުރީދޫ މޯލްޑިވްސް އިން ވަނީ 5ޖީ ހޯމް ބްރޯޑްބޭންޑް އެއަރފައިބަރ 10 ގުނަ އިތުރު ސްޕީޑާއެކު މުޅިން އަލަށް ރާއްޖެއަށް ތަޢާރަފް ކޮއްފައެވެ. 

އުރީދޫއިން ބޭއްވި 5 ޖީ ތައާރަފްކުރުމުގެ ރަސްމިއްޔާތުގައި މިނިސްޓަރ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީ މުހައްމަދު މަލީހް ޖަމާލްއާއި، އިކޮނޮމިކް މިނިސްޓަރ އަލްއުސްތާޒް ފައްޔާޒް އިސްމާއިލް  އުރީދޫ މޯލްޑިވްސްގެ ޗެއަރމަން އެންޑުރޫ ކުވެލްސެތްއާއި މެނޭޖިންގް ޑިރެކްޓަރ އަދި ސީއީއޯ، ނަޖީބު ޙާން ވަނީ ބައިވެރިވެވަޑައިގަންނަވާފައެވެ.

advertisement

މި ޙަފްލާ ގައި ވާހަކަފުޅު ދައްކަވަމުން މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ، މުހައްމަދު މަލީހް ޖަމާލް ވިދާޅުވެފައިވަނީ 5ޖީ ޓެކްނޮލޮޖީ އާއެކު ރާއްޖޭގެ ޑިޖިޓަލް އިންފްރާސްޓްރަކްޗަރ އިތުރަށް ވަރުގަދަވެ މުޖުތަމަޢު ތަކަށް ބޮޑެތި ހައްލުތައް ލިބިގެންދާނެކަމަށެވެ.   

” 5ޖީ ޓެކްނޮލޮޖީ މުޅިދުނިޔެ ބަލާލި ކަމުގައިވިޔަސް އާދަޔާ ޚިލާފު ބޮޑެތި ބަދަލުތަކެއް ހުރިހާ ދާއިރާއަކަށްވެސް ލިބިގެން ދިއުމުގެ ޤާބިލްކަން ހުރި ޓެކްނޮލޮޖީއެއްކަން ދަނީ ސާބިތު ކޮށްދެމުންނެވެ. ގައުމުގެ އިގްތިޞޯދީ އަދި އިޖްތިމާޢީ ކުރިއެރުމަށް އިންޓަނެޓް ގެ ޚިދުމަތް ގެ މުހިންމުކަން މިއަދު މިވަނީ އެތައްގުނައަކަށް އިތުރުވެފަ.  5ޖީ ޓެކްނޮލޮޖީ އާއެކު ރާއްޖޭގެ ޑިޖިޓަލް އިންފްރާސްޓްރަކްޗަރ އިތުރަށް ވަރުގަދަވެ މުޖުތަމަޢު ތަކަށް ބޮޑެތި ހައްލުތައް ލިބިގެންދާނެކަމީ ޝައްކެއް ނެތް ކަމެކެވެ.  ޑިޖިޓަލް މޯލްޑިވްސް އެއް ގާާއިމުކޮށް ވަރުގަދަ ނެޓްވާރކް އަކާއެކު އައު އީޖާދީ ޓެކްނޯލޮޖީ އާއި ދިވެހިން ގުޅުވާލަދިނުމަށް އުރީދޫ މޯލްޑިވްސް ގެ މެނޭޖްމަންޓް އަދި ސްޓާފުން މެދުކެޑުމެއްނެތި ކުރައްވާ މަސައްކަތަށް ޝުކުރު އަދާކުރަން.” މިނިސްޓަރ މަލީހު ވިދާޅުވިއެވެ.

އުރީދޫ މޯލްޑިވްސް ގެ މެނޭޖިންގ ޑިރެކްޓަރ އަދި ސީ.އީ.އޯ ނަޖީބް ހާން ވިދާޅުވީ، ދުނިޔެއަށް ކުރިމަތިވި ޕެންޑަމިކް އާއި ގުޅިގެން ދިމާވި ދަތިތަކާއެކުވެސް އުރީދޫ މޯލްޑިވްސް އިން މަސައްކަތް ކޮށްފައިވަނީ 5ޖީ ގެ ޚިދުމަތް ރާއްޖެއަށް ތަޢާރަފް ކުރުން އެއީ އެންމެ މުހިންމު ކަމެއް ކަމުގައި ދެކިގެންކަމަށެވެ. އަދި މުޖުތަމައު ތަކުގެ ދިރިއުޅުމުގެ އައު ވައްޓަފާޅިއަށް ބިނާކޮށް ޑިޖިޓަލް ކޮށް ގުޅިފައިވާ މުޖުތަމައު އެއް އުފެއްދުމަކީ މިވަގުތަށް އެންމެ މުހިންމުކަމެއްކަމުގައިދެކިގެންކަމަށެވެ.

“ފާއިތުވެދިޔަ އަހަރު ތެރޭގައި ރާއްޖޭގެ ހުރިހާ ދާއިރާއަކުންވެސް ޑިޖިޓަލް ޒަރީޢާތަކަށް ބަރޯސާވެ ޚިދުމަތްތަކަށް ބޮޑެތި ބަދަލުތަކެއް ވަނީ ފެނިގެން ގޮސްފަ. ދުނިޔެއަށް ކުރިމަތިވި ޕެންޑަމިކް އާއި ގުޅިގެން ދިމާވި ދަތިތަކާއެކުވެސް އުރީދޫ މޯލްޑިވްސް އިން މަސައްކަތް ކޮށްފައިވަނީ 5ޖީ ގެ ޚިދުމަތް ރާއްޖެއަށް ތަޢާރަފް ކުރުން އެއީ އެންމެ މުހިންމު ކަމެއް ކަމުގައި ދެކިގެން. މުޖުތަމައު ތަކުގެ ދިރިއުޅުމުގެ އައު ވައްޓަފާޅިއަށް ބިނާކޮށް ޑިޖިޓަލް ކޮށް ގުޅިފައިވާ މުޖުތަމައު އެއް އުފެއްދުމަކީ މިވަގުތަށް އެންމެ މުހިންމުކަމެއްކަމުގައިދެކިގެން. ހަމަ އެޔާއެކު 5ޖީގެ ހަލުވި ސްޕީޑް ގިނަބަޔަކަށް ތަޖުރިބާ ކުރުމުގެ ފުރުސަތު ހުޅުވާލުމުގެ ގޮތުން މިއަދު އަޅުގަނޑުމެންމިވަނީ 5ޖީ އެއަރފައިބަރ މާލޭގެ ގިނަ ހިސާބުތަކަކަށް ތައާރަފްކުރެވިފައި. މި ހިދުމަތާއެކު ފައިބަރ އޮޕްޓިކް މެދުވެރިކޮށް އިނަޓަނެޓްގެ ހިދުމަތް ފޯރުކޮށްދިނުމަށް ދިމާވާ ދަތިތަކަށް ހައްލެއްލިބި ވައިގެ ޒަރިއްޔާއިން އެތަށްގުނައަކަށް އިތުރު ސްޕީޑާއެކު ފުރިހަމަ އިންޓަނެޓްގެ ފައިދާތަށް މުޖުތަމައުތަކަށް ލިބިގެންދާނެކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. ޑިޖިޓަލް ދިވެހިރާއްޖެއެއް ބިނާކުރުމުގައި އަޅުގަނޑުމެން މިކުރާ މަސައްކަތުގައި ދެމި ތިބެ، ރާއްޖޭގެ ހުރިހާ ކަންކޮޅުތަކަކަށް 5ޖީގެ ހިދުމަތް ފޯރުކޮށްދީ އައު ފުރުސަތުތަކާ ގުޅުވާލަދިނުމުގެ މަސައްކަތް ކުރިއަށް އޮތްތަނުގައިވެސް ކުރަމުންދާނެކަމުގެ ޔަގީންކަން އަރުވަން.” ނަޖީބް ހާން ވިދާޅުވިއެވެ.

5ޖީޓެ ޓެކްނޮލޮޖީ އާއި އެކު ލިބިގެންދާ ހައިސްޕީޑްގެ އިތުރުން އިންޓަނެޓާއި ކަނެކްޓްރުމުގައި ދިމާވާ ލަސްތައްވެސް އެތައްގުނައަކަށް ކުޑަވެގެންދާނެކަމަށް އުރީދޫއިން ބުނެއެވެ. ޕްރީޕެއިޑް އަދި ޕޯސްޓްޕެއިޑް ކަސްޓަމަރުންނަށް ވެސް 5ޖީ ފޯރުކޮށްދޭއިރު، މާލޭގެ ބޮޑު ސަރަހައްދަކުން، 5ޖީ ޑިވައިސްތައް މެދުވެރިކޮށް މިޙިދުމަތް ލިބިގެންދާނެއެވެ. ރަސްމީކޮށް ޚިދުމަތްދޭން ފެށުމަށްފަހު، އަދިވެސް އިތުރު ޑިވައިސްތަކަށް މި ޚިދުމަތް ފޯރުކޮށްދިނުމަށް، ދުނިޔޭގެ އެކި އޮޕަރޭޓަރުންނާއި ގުޅިގެން މަސައްކަތް ކުރެވެމުން އެބަދެއެވެ. އުރީދޫއިން 5ޖީ ފޯރުކޮށްދޭ ސަރަހައްދުތަކުގެ ޗާޓު، ވެބްސައިޓް މެދުވެރިކޮށް ބައްލަވާލެވޭނެކަމަށް އުރީދޫއިން ބުނެއެވެ.