ޤަތަރު އެއަރވޭސްއިން ރާއްޖެއަށް ތަޢާރަފްކޮށްފައިވާ ސޭފް ޓްރެވެލް ބަބުލްގެ މުއްދަތު އިތުރުކޮށްފި

ޤަތަރު އެއަރވޭސްއިން ރާއްޖެއާއި ޤަތަރާއި ދެމެދު ތަޢާރަފްކޮށްފައިވާ ސޭފް ޓްރެވެލް ބަބުލްގެ މުއްދަތު އިތުރުކޮށްފިއެވެ.
ސޭފް ޓްރެވަލް ބަބުލްގެ މުއްދަތު އިތުރުކޮށްފައިވަނީ ފަތުރުވެރިންގެ މެދުގައި މި ޕެކޭޖަށް ބޮޑު ޑިމާންޑެއް އޮތުމުންކަމަށް ޤަތަރު އެއަރވޭސްއިން ބުނެއެވެ. ކުރިން މިޕެކޭޖުގެ ދަށުން ރާއްޖެއަށް ދަތުރު ކުރެވޭނީ 1 ޑިސެމްބަރާއި 7 ޖެނުއަރީ އާ ދެމެދުއެވެ. ނަމަވެސް މިހާރުވަނީ 31 ޖެނުއަރީ އާއި ހަމައަށް މުއްދަތު އިތުރުކޮށްފައެވެ. މި ޕެކޭޖްގެ ދަށުން ނަގާ ޓިކެޓު އަންނަ ފެބްރުއަރީމަހުގެ 5 ވަނަ ދުވަހުގެ ކުރިން ބޭނުންކުރަން ޖެހޭނެކަމަށް ޤަތަރު އެއަރވޭސްއިން ހާމަކުރެއެވެ.

ޤަތަރު އެއާވޭއިސްގެ ސޭފް ޓްރެވެލް ބަބުލްއަކީ ޤަތަރުގެ ރައްޔިތުންނާއި އެޤައުމުގެ ދިރިއުޅެމުންދާ މީހުންނަށް ހާއްސަ ޕެކޭޖެކެވެ. ޤަތަރު އެއާވޭސްގެ ސޭފް ޓްރެވެލް ބަބުލްގެ ދަށުން އަންނަ ފަތުރުވެރިން ރާއްޖެ އަންނާނީ ކޯވިޑްއަށް ޓެސްޓު ކުރުމަށް ފަހުއެވެ. އަދި އަނބުރާ ޤައުމަށް ދިއުމަށްފަހު ރެޕިޑް ޕީސީއާރު ޓެސްޓެއް ހަދާނެއެވެ. މި ޓެސްޓުން ނަތީޖާ ނެގެޓިވްވާ ފަރާތްތައް އެޤައުމުގައި ކަރަންޓީނު ވާން ނުޖެހޭނެއެވެ.
ކޯވިޑް19 އަށްފަހު ރާއްޖޭގެ ބޯޑަރު އަލުން ހުޅުވާލުމާއިއެކު ގިނަ އަދަދެއްގެ ފަތުރުވެރިން ޤަތަރު އެއަރވޭސްއިން ރާއްޖެ އާދެއެވެ. ޤަތަރު އެއަރވޭސްއިން ރާއްޖެއާއި ދެމެދު ޤާއިމްކުރި ސޭފް ޓްރެވެލް ބަބުލްގެ ސަބަބުން އެ އެއަރލައިނުން ރާއްޖެއަށް ކުރަމުންއައި ދަތުރުތައްވެސް ވަނީ މިހާރު އިތުރުކޮށްފައެވެ.

advertisement