ޔޫކްރެއިން އިންޓަރނޭޝަނަލް އެއަރލައިންސްގެ ޙާއްސަ ދަތުރުތަކެއް ރާއްޖެއަށް

ޔޫކްރެއިން އިންޓަރނޭޝަނަލް އެއަރލައިންސްގެ ދަތުރުތަކެއް ރާއްޖެއަށް ފަށައިފިއެވެ. ޔޫކްރެއިން އިންޓަނޭޝަނަލް އެއަރލައިނުން ރާއްޖެއަށް މިފެށި ދަތުރުތައް އަންނަ މަހުގެ ނިޔަލަށް ބާއްވާ ގޮތައް ވަނީ ހަމަޖެހިފައެވެ. ގިނަ އެއަރލައިންތަކަކުން ވިންޓަރ ސީޒަންއާއި ދިމާކޮށް ރާއްޖެއަށް ޙާއްސަ ދަތުރުތައް އަންނަނީ ބާއްވަމުންނެވެ.
ޔޫކްރެއިން އިންޓަރނޭޝަނަލްއިން ރާއްޖެއަށް ދަތުރުތައް ކުރުމަށް ހަމަޖެހިފައިވަނީ ޔޫކްރެއިންގެ ވެރިރަށް ކިއޭވްއިން ވެލާނާ އިންޓަރނޭޝަނަލް އެއަރޕޯޓަށެވެ.

ޔޫކްރެއިން އެއަރލައިންސްގެ ދަތުރުތައް ރާއްޖެއަށް ފަށާފައިވަނީ އިއްޔެއެވެ. އެ އެއަރލައިންގެ ފުރަތަމަ ފްލައިޓުގައިވެސް ރާއްޖެއަށް 277 ފަތުރުވެރިން ވަނީ އައިސްފައެވެ. ފަތުރުވެރިކަމުގެ ހައި ސީޒަނާއި ދިމާކޮށް މީގެކުރިންވެސް ޔޫކްރެއިން އިންޓަރނޭޝަނަލް އެއަރލައިންސްގެ ދަތުރުތައް ރާއްޖެއަށް ބާއްވާފައިވެއެވެ.
ކޯވިޑް19 އަށްފަހު ރާއްޖޭގެ ބޯޑަރު ހުޅުވާލުމާއިއެކު ޔޫކްރެއިންއިން ރާއްޖެއަށް އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ. އެގޮތުން ޖުލައި 15 އިން ޑިސެމްބަރ 23 ގެ ނިޔަލަށް އެޤައުމުން ރާއްޖެއަށް 4181 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

advertisement