ރިސޯޓް ތަރައްޤީކުރުމަށް 3 ރަށަކާއި ފަޅެއް ދޫކުރަނީ

ރާއްޖޭގެ 4 އަތޮޅަކުން 3 ރަށާއި އަދި ފަޅެއް ރިސޯޓު ތަރައްޤީކުރުމަށް ހުޅުވާލައިފިއެވެ.
ޓުއަރިޒަމް މިނިސްޓްރީން ރިސޯޓު ތަރައްޤީ ކުރުމަށް ހުޅުވާލާފައިވަނީ، ހއ. އަލިދުއްފަރުފިނޮޅު، ށ. ކުޑަޅައިމެންދޫ، ނ. ކުންނަމަލެއި އަދި ހދ އަތޮޅުން ދަނޑުވެރިކަމަށް ދޫކޮށްފައިވާ ވައިކުރަމުރައިދޫން 15 ހެކްޓަރުގެ ބިމެކެވެ.

މިކަމާ ގުޅޭ މައުލޫމާތު ދިނުމަށް ޖެނުއަރީ 14ވަނަ ދުވަހުގެ މެންދުރު 1:00ގައި ޒޫމް މެދުވެރިކޮށް ބައްދަލުވުމެއް ބާއްވާނެ އެވެ. މި ސެޝަނުގައި ބައިވެރިވާން ބޭނުންވާ ފަރާތްތަކުން އެފަރާތްތަކުގެ މައުލޫމާތު 13 ޖެނުއަރީގެ 14:00 ކުރިން އެންގުމަށް މިނިސްޓްރީން ވަނީ އެދިވަޑައިގެންފައެވެ.

މި ތިން ރަށާއި، ބިމުގެ ބީލަން ފޮތް މި ޑިސެމްބަރު މަހުގެ 31 ވަނަ ދުވަހުން ފެށިގެން އަންނަ އަހަރު މާޗު މަހުގެ 4 ވަނަ ދުވަހުގެ ނިޔަލަށް މިނިސްޓްރީން ގަނެވޭނެކަމަށް ޓުއަރިޒަމް މިނިސްޓްރީން ބުނެއެވެ. އަދި ބީލަން ހުށަހެޅުން މާޗު މަހުގެ 7 ވަނަ ދުވަހު އޮންނާނެ ކަމަށް ޓުއަރިޒަމް މިނިސްޓްރީން ވިދާޅުވިއެވެ.

ސަރުކާރުން ރިސޯޓު ތަރައްޤީ ކުރުމަށް ހުޅުވާލާ މިރަށްތަކަކީ މި ސަރުކާރުން މުޅިން އަލަށް ރިސޯޓު ތަރައްޤީ ކުރުމަށް ހުޅުވާލާނެކަމަށް މިދިޔަ އަހަރު އިއުލާން ކޮށްފައިވާ 29 ރަށުގެ ތެރޭގައި ހިމެނޭ ރަށްތަކެކެވެ. އުތުރުގެ ހަތަރު ރަށުގައި ޓޫރިޒަމް ތަރައްގީކުރަން ހުޅުވާލާފައިވާއިރު، އުތުރާއި ދެކުނުގެ ޓޫރިޒަމް ބިމު ކުލި ކުޑަކުރަން ޓޫރިޒަމް ގާނޫނަށް މިމަހު ވަނީ އިސްލާހުވެސް ގެނެސްފަ އެވެ.

advertisement