އަހަރުގެ މިހާތަނަށް 542،000 އަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފި

މިއަހަރުގެ މިހާތަނަށް ރާއްޖެއަށް 542،287 މީހުން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތައް ދައްކައިފިއެވެ.

މި އަހަރު ނިމުމުގެ ކުރިން ރާއްޖެއަށް 540،000 ޓޫރިސްޓުން ގެނައުމުގެ ޓާގެޓް ކަނޑައެޅިއިރު މިހާރު މިވަނީ މި ޓާގެޓް ހާސިލްވެފައެވެ. ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން ބޯޑަރު ހުޅުވާލިފަހުން މިހާތަނަށް ރާއްޖެ އައިސްފައިވަނީ 159،440 ފަތުރުވެރިންނެވެ.

advertisement

އިއްޔެއަކީ ކޮވިޑް-19 ފެތުރޭތީ ބޯޑަރު ބަންދުކޮށް ޓޫރިޒަމް ހުއްޓުމަކަށް ގެނައުމަށް ފަހު އަލުން ބޯޑަރު ހުޅުވައިލި ފަހުން އެއާޕޯޓަށް އެންމެ ބިޒީ ދުވަހެވެ. އިއްޔެ ވެސް 6،000 އަށް ވުރެ ގިނަ ޓޫރިސްޓުން އައިސްފައިވެ އެވެ.

މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. އެޤައުމުން ރާއްޖެއަށް 46،065 ފަތުރުވެރިން ވަނީ އައިސްފައެވެ. 2 ވަނައިގައި އުޅެނީ އިޓަލީއެވެ. އެޤައުމުން ރާއްޖެއަށް 45،645 ފަތުރުވެރިން ވަނީ އައިސްފައެވެ. 44،268 ފަތުރުވެރިންނާއިއެކު މިއަހަރު ރާއްޖެއަށް 3 ވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ.

ބޯޑަރު ހުޅުވާލުމާއިއެކު މިހާތަނަށް ރާއްޖޭގައި ހުރި ފަތުރުވެރިންނަށް ޙިދުމަތްދޭ 510 ތަނެއް ވަނީ ހުޅުވާފައެވެ. މިއީ ޖުމްލަ 40،935 އެނދެވެ. މީގެތެރޭގައި ރިސޯޓް، މެރީނާ، ހޮޓެލް، ސަފާރީ އަދި ގެސްޓްހައުސްތައް ހިމެނެއެވެ.