ޑްރައިވިން ލައިސަންސްގެ ބަދަލުގައި ޕާސްޕޯޓް ކާޑު ބޭނުން ނުކުރެވޭ ގޮތަށް ހަދައިފި

ޑްރައިވިން ލައިސަންސްގެ ބަދަލުގައި ޕާސްޕޯޓް ކާޑު ބޭނުން ނުކުރެވޭ ގޮތަށް އިމިގްރޭޝަނުން ހަމަޖައްސައިފި އެވެ.

ޕާސްޕޯޓް ކާޑުގެ ގަވާއިދަށް އިމިގްރޭޝަނުން އިއްޔެ ގެނައި އިސްލާހުގައި ވަނީ ލައިސަންސްގެ ބަދަލުގައި ޕާސްޕޯޓް ކާޑު ބޭނުން ކުރެވޭ ގޮތަށް އޮތްއޮތުން އުވާލައިފަ އެވެ. އެހެންކަމުން ޑްރައިވިން ލައިސަންސްގެ ބަދަލުގައި ދެން ޕާސްޕޯޓް ކާޑު ބޭނުމެއް ނުކުރެވޭނެއެވެ.

advertisement

އެ ގަވާއިދުގައި ބުނާ ޚިދުމަތްތަކުގެ އިތުރަށް އިތުރު ޚިދުމަތްތައް ޕާސްޕޯޓް ކާޑު މެދުވެރިކޮށް ދިނުމުގެ ބާރު އިމިގްރޭޝަނަށް އޮންނާނެ ކަމަށް އެ އިސްލާހުގައިވެ އެވެ.

އިމިގްރޭޝަނުން 2017 ވަނަ އަހަރު ތައާރަފްކުރި ޕާސްޕޯޓް ކާޑަކީ ރާއްޖެ އާއި ރާއްޖެއިން ބޭރަށް ދަތުރުފަތުރު ކުރުމާއި ބޭންކް އޮފް މޯލްޑިވްސް (ބީއެމްއެލް) ގެ މާސްޓާ ކާޑާއި އެލައިޑް އިންޝުއަރެންސްގެ ޚިދުމަތްތަކަށް ބޭނުން ކުރުމުގެ އިތުރުން އައިޑީކާޑާއި ލައިސަންސްގެ ބަދަލުގައި ވެސް ބޭނުން ކުރެވޭ ގޮތަށް އޮތް ކާޑެކެވެ. ޕާސްޕޯޓް ކާޑަކީ ސެކިއުރިޓީ ފީޗަރސް ވަރުގަދަ، އޭގެ ވެރިފަރާތުގެ ހުރިހާ މަޢުލޫމާތެއް ހިމެނޭ ކާޑެކެވެ.

ޕާސްޕޯޓު ކާޑަކީ އިލެކްޓްރޯނިކް ޕާސްޕޯޓް އޮންނަ ފަރާތްތަކަށާއި، މޯލްޑިވްސް އިމިގްރޭޝަނަށް ހާޒިރުވެ، ކާޑުގައި ހިމެނުމަށް އިނގިލީގެ ނިޝާން އިލެކްޓްރޯނިކްކޮށް ދެވޭނެ ފަރާތްތަކަށް ދޫކުރާ ކާޑެކެވެ.