700 ޓަނުގެ މުދަލާއިއެކު ކާގޯފެރީ ކުޅުދުއްފުއްޓަށް ބަނދަރުކޮށްފި

ކާގޯ ފެރީ 700 ޓަނުގެ މުދަލާއިއެކު މިއަދު ކުޅުދުއްފުއްޓަށް ބަނދަރުކޮށްފިއެވެ. ކާގޯ ފެރީ ކުޅުދުއްފުއްޓަށް ދަނީ ކޮޗިންއިން ޓުޓިކޮރިންއަށް، ޓުޓިކޮރިންއިން މާލެއަށް އަދި މާލެއިން ކުޅުދުއްފުއްޓަށެވެ. ކޮޗިން-ކުޅުދުއްފުށި ފެރީ ޚިދުމަތް ދިނުމުގައި ޙަރަކާތްތެރިވާ ރާއްޖޭގެ އެޖެންޓް މޯލްޑިވްސް ސްޓޭޓް ޝިޕިންގ އިން ބުނީ މިފަހަރުގެ ކާގޯ ފެރީގައި 700 ޓަނުގެ މުދާ ގެނެސްފައިވާކަމަށެވެ. މީގެތެރޭގައި ގިނައިން ހިމެނެނީ އިމާރާތްކުރުމަށް ބޭނުންކުރާ ތަކެއްޗެވެ. އަދި އާންމު މުދަލެވެ. މިއީ ކާގޯ ފެރީއިން ކުޅުދުއްފުއްޓަށް އައި 4 ވަނަ ފަހަރެވެ. ކޮންމެ ފަހަރަކުވެސް ކާގޯ ފެރީއިން ކުޅުދުއްފުއްޓަށް ގެންނަ މުދަލުގެ އަދަދު އިތުރުވަމުންއަންނަކަމަށް މޯލްޑިވްސް ސްޓޭޓް ޝިޕިންގ އިން ބުނެއެވެ.

ކޮޗިން ފެރީއިން ރާއްޖެއަށް މުދާ ގެންނަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާކަމަށް މޯލްޑިވްސް ސްޓޭޓް ޝިޕިންގ އިން ބުނެއެވެ. އެ ކުންފުނީގެ ހޮޓްލައިންއަށް ނުވަތަ އީމެއިލް މެދުވެރިކޮށް މުދާ ގެނައުމުގެ އިންތިޒާމް ވަނީ ހަމަޖައްސާފައެވެ.

advertisement

އިންޑިއާގެ ކޮޗިންއާއި ކުޅުދުއްފުއްޓާއި ދެމެދު ކާގޯ ފެރީގެ ޙިދުމަތް ފަށާފައިވަނީ މިދިޔަ އަހަރުގެ ސެޕްޓެމްބަރ މަހުގެ 26 ވަނަ ދުވަހުއެވެ.

ކާގޯ ފެރީން މުދާ މާލެ ގެނައުމުގެ ބަދަލުގައި ރާއްޖޭގެ އެކި ސަރަހައްދުތަކަށް މުދާ ގެންދިއުމުގެ ސަބަބުން ވިޔަފާރިތައް ކުރިއަރައި އަގުހެޔޮކޮށް  މުދާ ލިބޭނެ މަގު ފަހިވެގެންދާނެއެވެ.