ފުޑް ކޯޓުގެ 13 ގޮޅިއެއް ބީލަމަށް ހުޅުވާލައިފި

އެސްޓީއޯއިން ފުޑް ކޯޓުގެ 13 ގޮޅިއެއް ބީލަމަށް ހުޅުވާލައިފި އެވެ.

މި ގޮޅިތަކަށް އެދި ޕްރޮޕޯސަލް ހުށަހެޅުމުގެ ފުރުސަތު މި މަހުގެ 14 ވަނަ ދުވަހުގެ މެންދުރު 2:00އާ ހަމައަށް ހުޅުވާލައިފައިވާ ކަމަށް އެސްޓީއޯއިން ބުނެއެވެ.

advertisement

މިފަހަރު އެސްޓީއޯއިން ގޮޅިތައް ދޫކުރަން ނިންމާފައިވަނީ ލުއިތަކަކާވެސް އެކުގައެވެ. އެގޮތުން ކުރިން ނަގަމުން އައި 100,000 ރުފިޔާގެ ބިޑް ސެކިއުރިޓީ އާއި އެޑްވާންސް ކުލި ނުނަގަން ވަނީ ނިންމާފައެވެ. އަދި ކުރިން ތިން މަހުގެ ސެކިއުރިޓީ ޑިޕޮޒިޓް ނެގި ނަމަވެސް މިހާރު ނަގާނީ ދެ މަހުގެ ސެކިއުރިޓީ ޑިޕޮޒިޓް ކަމަށް ވެސް އެސްޓީއޯއިން ވަނީ ބުނެފައެވެ.

ގޮޅިތަކުގެ ކުލި މިހާރު ކުޑަކޮށްފައިވާއިރު ކުރިން ބިޑް ހުށަހަޅާއިރު ހުށަހަޅަން ޖެހޭ ބިޒްނަސް ޕްލޭންވެސް މިހާރު ހުށަހަޅަން ނުޖެހޭގޮތައް ވަނީ ހަމަޖައްސާފައެވެ.

ފުޑް ކޯޓުގެ ގޮޅިތަކަށް އެދި ހުށަހަޅާ ފަރާތްތަކުގެ ތެރެއިން ބިޑް ކާމިޔާބުކުރާ ފަރާތްތަކުން ހަތް ދުވަހުގެ ތެރޭގައި ސެކިއުރިޓީ ޑިޕޮސިޓްގެ ގޮތުގައި ދެ މަސް ދުވަހުގެ ކުލި އެޑްވާންސްކޮށް ދައްކަން ޖެހޭނެ އެވެ. އެއީ އަކަފޫޓެއް 39ރ. ގެ ރޭޓުންނެވެ. ކުރިން އަކަފޫޓަކަށް 53ރ. ދައްކަން ޖެހެ އެވެ.