ހެވީ ވެހިކަލް އޮޕަރޭޓް ކުރުމަށް އެމްޓީސީސީއިން ދިވެހިންނަށް ތަމްރީން ޕްރޮގްރާމެއް ހިންގަނީ

ބިދޭސީންގެ ބަދަލުގައި ދިވެހިންނަށް ވަޒީފާގެ ފުރުސަތު ހޯދައިދިނުމަށް، ހެވީ ވެހިކަލް އޮޕަރޭޓް ކުރުމުގެ ތަމްރީން ޕްރޮގްރާމެއް އެމްޓީސީސީން ތައާރަފުކޮށްފި އެވެ.

ހުނަވަރު ގެ ނަމުގައި ކުރިއަށްގެންދާ މި ޕްރޮގްރާމްގައި 18 އަހަރުން މަތީގެ ކޮންމެ ދިވެއްސަކަށް ވެސް ބައިވެރިވެވޭގޮތައް އެމްޓީސީސީން ވަނީ ހަމަޖައްސާފައެވެ. މި ޕްރޮގުރާމް ކުރިއަށް ގެންދިއުމަށް ހަމަޖެހިފައިވަނީ ތިން މަސް ދުވަހުގެ ނިޔަލަށެވެ. ޕްރޮގްރާމް ކުރިއަށްދާ މުއްދަތުގައި ބައިވެރިންނަށް ކޮންމެ މަހަކު އެލަވަންސްގެ ގޮތުގައި 5،000ރ. ލިބޭނެކަމަށް އެމްޓީސީސީއިން ބުނެއެވެ.

advertisement

އެމްޓީސީސީގެ ސީއީއޯ އާދަމް އާޒިމް ވިދާޅުވި ގޮތުގައި މި ފުރުސަތު ދިވެހިންނަށް ހުޅުވާލީ މިވަގުތު އެ ކުންފުނީގައި ހެވީ ވެހިކަލް އޮޕަރޭޓް ކުރަން ތިބި ހުރިހާ ބިދޭސީ މުވައްޒަފުންގެ ބަދަލުގައި ދިވެހިންނަށް އެ ފުރުސަތު ހޯދައި ދިނުމަށްކަމަށެވެ. އާޒިމް ވިދާޅުވީ މިއީ ދިވެހިން ނިކުމެއްޖެނަމަ ރަނގަޅު އާމްދަނީއެއް ލިބޭނެ ދާއިރާއެއްކަމަށެވެ.

މި ޕްރޮގްރާމް ފެށުމުގެ ގޮތުން ރާއްޖޭގެ އެންމެ ދެކުނުން ފުވައްމުލަކާއި އައްޑޫގައި އޯޕަން ޑޭއެއް ބާއްވަން ވަނީ ހަމަޖެހިފަ އެވެ. ފުވައްމުލަކުގައި މި މަހުގެ ނުވަވަނަ ދުވަހު އޯޕަން ޑޭ ބާއްވާއިރު އައްޑޫގައި ބާއްވާނީ މި މަހުގެ 11 ވަނަ ދުވަހު އެވެ. މީގެ އިތުރުން ކުޅުދުފުއްޓާއި މާލޭގައި ވެސް އޯޕަން ޑޭ ބާއްވާނެ އެވެ. ނަމަވެސް އޯޕަން ޑޭ ބާއްވާ ތާރީހު އެމްޓީސީސީން އިއުލާން ނުކުރެ އެވެ.

އޯޕަންޑޭގައި ބައިވެރިވާ މީހުންގެ ތެރެއިން މިވަގުތު އެމްޓީސީސީން އިއުލާން ކޮށްފައިވާ ވަޒީފާތަކަށް އެދި ހުށަހަޅަން ބޭނުންވާ މީހުންނަށް އެ ފުރުސަތު ވެސް ހުޅުވާލާނެ ކަމަށް އެ ކުންފުނިން ވަނީ ބުނެފައެވެ. އަދި އޯޕަން ޑޭ ބާއްވާ ރަށް ނޫން އެހެން ރަށަކުން މީހަކު ބައިވެރިވާން ބޭނުންވާ ނަމަ އެ ކުންފުންޏަށް އީމެއިލަކުން އެކަން އަންގަން ވަނީ އެދިފަ އެވެ.