މިއަހަރުގެ ފަތުރުވެރިކަމުގެ ރަސްމީ ހަރަކާތްތައް އައްޑޫގައި

މި އަހަރުގެ ދުނިޔޭގެ ޓޫރިޒަމް ދުވަހުގެ ރަސްމީ ހަރަކާތްތައް އައްޑޫގައި ބާއްވަން ނިންމައިފި އެވެ.

“ބްރިޓިޝް ލޯޔަލްޓީ ޝިޕް ރެކް” އަށް 75 އަހަރު ފުރުން ފާހަގަކުރުމުގެ ރަސްމިއްޔާތުގަ ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ މިއަހަރުގެ ފަތުރުވެރިކަމުގެ މައި ހަރަކާތްތައް ކުރިއަށްގެންދާނީ އައްޑޫ ސިޓީގައިކަން އިޢުލާންކުރައްވާފައެވެ.

advertisement

މިނިސްޓަރު ވިދާޅުވީ އައްޑޫގައި ޓޫރިޒަމް ފުޅާކުރަން މި އަހަރު ހާއްސަ ކަންތައްތަކެއް ކުރާ އިރު އައްޑޫ ކައުންސިލުން ދިން ދައުވަތު ގަބޫލުކޮށް އެ ސިޓީގައި ދުނިޔޭގެ ޓޫރިޒަމްގެ ދުވަސް ފާހަގަކުރަން ނިންމާފައިވާ ކަމަށެވެ.

“ދުނިޔޭގެ ފަތުރުވެރިކަމުގެ ދުވަހަކީ ރައްޖޭގައި ވަރަށް ކުލަގަދަކޮށް ފާހަގަ ކުރާ ދުވަހެއް. މިދިޔަ އަހަރު ފަނޑުކޮށް ފާހަގަކުރުމުގެ ފުރުސަތު ލިބުނީ. އެހެންނަމަވެސް ސިޓީގެ މޭޔަރ އަޅުގަނޑުމެންނަށް އެ ދެއްވި ދައުވަތު ބަލައިގަނެ އިރާދަ ކުރެއްވީޔާ، ދުނިޔޭގެ ފަތުރުވެރިކަމުގެ ދުވަސް ރާއްޖޭގައި ފާހަގަކުރާއިރު މައި ހަރަކާތްތައް ގެންދާނީ އައްޑޫސިޓީގައި” ޓުއަރިޒަމް މިނިސްޓަރ ވިދާޅުވިއެވެ.

މިނިސްޓަރ މައުސޫމް ވިދާޅުވީ ދަނޑުވެރިކަމާއި މަސްވެރިކަމަކީ ފަތުރުވެރިކަމާއި ގުޅި ލާމެހިފައިވާ ދެ ސިނާއަތަށްވާއިރު، އައްޑޫ ސިޓީގެ ދެ ރިސޯޓެއް ބަންދުކުރުމުން އައްޑޫގެ ދަނޑުވެރިންނަށް އަސަރުކޮށްފައިވާކަމަށެވެ. އެހެންކަމުން މިއަހަރު ފަތުރުވެރިކަމާއި މަސްވެރިކަމާއި ދަނޑުވެރިކަން ކުރިއެރުވުމަށް ސަރުކާރުގެ ސިޔާސަތުތައް ބައްޓަން ކުރުމަށް ކަނޑައެޅިފައިވާ ކަމަށް މިނިސްޓަރ ވިދާޅުވިއެވެ.

ދުނިޔޭގެ ފަތުރުވެރިކަމުގެ ދުވަހަކީ ސެޕްޓެމްބަރ މަހުގެ 27 ވަނަ ދުވަހެވެ. ކޮންމެ އަހަރަކުވެސް ފަތުރުވެރިކަމުގެ ދުވަސް ރާއްޖޭގައި ކުލަގަދަކޮށް ފާހަގަކުރެއެވެ. ނަމަވެސް ކޯވިޑް19 ގެ ސަބަބުން މިދިޔަ އަހަރު މިދުވަސް ފާހަގަކުރުމަށް ރާއްޖޭގައި މާބޮޑު ހަރަކާތެއް ބާއްވާފައެއް ނުވެއެވެ. އަންނަ އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރުކަމުން މިއަހަރު ކުލަގަދަކޮށް ބޭއްވުމަށް ޓޫރިޒަމް މިނިސްޓްރީން މިހާރުވެސް ވަނީ މަސައްކަތް ފަށާފައެވެ.