މިފްކޯއާއި އެމްއެސްއެސް ގުޅިގެން ރާއްޖެއިން ބޭރަށް މަސް އެކްސްޕޯޓްކުރަން ފަށަނީ

ޤައުމީ ޝިޕިންގް ކުންފުނި، އެމްއެސްއެސް އާއި މިފްކޯ ގުޅިގެން ރާއްޖެއިން ބޭރަށް މަސް އެކްސްޕޯޓު ކުރުމުގެ މަސައްކަތް ފަށަން ނިންމާފައިވާ ކަމަށް މިފްކޯއިން ހާމަކޮށްފިއެވެ. ކޯވިޑް-19 އާއި ގުޅިގެން ރާއްޖެއިން ބޭރަށް މަސް އެކްސްޕޯޓު ކުރުންވަނީ މަޑުޖެހިފައެވެ.

މިފްކޯއިން އިތުރު 30 ކޮންޓެއިނަރ ރާއްޖެ ގެނައުމުގެ މަސައްކަތް މިހާރު ވަނީ ފަށާފައެވެ. މީގެ ތެރެއިން 12 ނުވަތަ 15 ކޮންޓެއިނަރ އަބަދުވެސް ފެލިވަރުގައި ބަހައްޓާނެކަމަށް އެ ކުންފުނިން ބުނެއެވެ.
އިތުރު ކޮންޓެއިނަރތައް ރާއްޖެ ގެނެސް މަސް ފިނިކޮށް ރައްކާ ކުރެވޭނެ އިންތިޒާމު ހަމަޖެހުމުން މަސްވެރިކަން ރަނގަޅުވެގެންދާ ދަނޑިވަޅުގައި ފެލިވަރުގައި ހުރި ދަތިތަކަށް ލުޔެއް ލިބޭނެ ކަމަށް މިފްކޯއިން ބުނެއެވެ.
މިފްކޯއިން މައުލޫމާތު ދިންގޮތުގައި، މިއިން ކޮންމެ ކޮންޓެއިނަރެއްގައި 25 ޓަނުގެ މަސް ރައްކާ ކުރެވޭނެއެވެ. އަދި ފެލިވަރު ބަނދަރުގައި އޮތް ބޯޓުން ފިނި ކުރުމަށްފަހު، ކޮންޓެއިނަރުގައި ރައްކާ ކުރެވިގެންދާނެ ކަމަށްވެސް މިފްކޯއިން ބުނެއެވެ.
މި އޮޕަރޭޝަންތައް ފެށުމާއެކު މަސްގަތުމާއި ރައްކާ ކުރުމުގައި ދިމާވާ ދަތިތަކަށް ލުޔެއް ލިބި ރާއްޖެއިން ބޭރަށް މަސް އެކްސްޕޯޓްކުރުމަށް އިތުރު ފަސޭހަތަކެއް ލިބިގެންދާނެއެވެ.

advertisement