މާލެ ސަރަހައްދުގެ ގެސްޓްހައުސްތައް އިންސްޕެކްޓް ކުރަނީ

މާލޭ ސަރަޙައްދުގެ ގެސްޓްހައުސްތައް އިންސްޕެކްޓްކުރުމުގެ މަސައްކަތް ފަށައިފިއެވެ. ގްރޭޓަރ މާލެ ސަރަހައްދުގައި ހެލްތު އިމަރޖެންސީ އޮޕަރޭޝަން ސެންޓަރުން ކުރިއަށްގެންދާ މި އިންސްޕެކްޝަންއަކީ ކޯވިޑްއިން ރައްކާތެރިވުމަށް ކަނޑައަޅާފައިވާ ގައިޑްލައިންއަށް އެ ތަންތަނުން އަމަލުކުރަމުންދޭތޯ ބެލުމަށް ކުރިއަށްގެންދާ އިންސްޕެކްޝަނެކެވެ.
އެޗް.އީ.އޯ.ސީގެ ތަރުޖަމާން ޑރ. ފާތުމަތު ނަޒްލާ ރަފީޤު ވިދާޅުވީ، މިމަހުގެ 6 ވަނަ ދުވަހުން ފެށިގެން ގްރޭޓަރ މާލޭ ސަރަޙައްދުގައި ހުޅުވައިގެން ޚިދުމަތްދެމުންދާ ގެސްޓްހައުސްތައް އިންސްޕެކްޓް ކުރުމުގެ މަސައްކަތް ފަށާފައިވާކަމަށެވެ. އެގޮތުން މިހާތަނަށް 30 ތަނެއް އިންސްޕެކްޓްކޮށްފައިވާއިރު، ޖުމްލަގޮތެއްގައި ހުރިހާތަނެއްގައިވެސް ކަނޑައަޅާފައިވާ ގައިޑްލައިނާއެއްގޮތަށް ޚިދުމަތްދެމުންދާކަން ފާހަގަކުރެވިފައިވާކަމަށެވެ.
ކޯވިޑް19 އަށްފަހު މާލެ ސަރަހައްދުގެ ހޮޓާތަކާއި ގެސްޓްހައުސްތައް ހުޅުވުމުގެ ހުއްދަ ސަރުކާރުން ދީފައިވަނީ އަތޮޅުތަކުގެ ގެސްޓްހައުސްތައް ހުޅުވާލިތާ 2 މަސްދުވަސްފަހުން މިދިޔަ ޑިސެމްބަރުމަހުގެ 14 ވަނަ ދުވަހުއެވެ.

ޓޫރިޒަމް މިނިސްޓްރީގެ އެންމެފަހުގެ ތަފާސް ހިސާބުތައް ދައްކާގޮތުން މާލެ، ވިލިމާލެ އަދި ހުޅުމާލެ ހިމެނޭހެން ގްރޭޓަރ މާލޭ ސަރަޙައްދުން 40 ގެސްޓްހައުސްއެއް މިވަގުތު އަންނަނީ އޮޕަރޭޓްކުރަމުންނެވެ. އެނދުގެ އަދަދުން ބަލާނަމަ އެއީ 1،114 އެނދެވެ. މުޅި ރާއްޖޭގައި މިހާތަނަށް 275 ގެސްޓްހައުސްއެއް ވަނީ އަލުން އޮޕަރޭޝަން ޙާލަތަށް ގެނެސްފައެވެ.

advertisement