ތިލަފުއްޓާއި ގުޅީފަޅުން ބިން ދޫކުރުން ވަގުތީގޮތުން މެދުކަނޑާލައިފި

ތިލަފުއްޓާއި ގުޅީފަޅުން ބިން ދޫކުރުން ވަގުތީގޮތުން މެދުކަނޑާލައިފި އެވެ. މިކަން ހާމަކޮށްފައިވަނީ އެޗްޑީސީން ނެރުނު ބަޔާނެއްގައެވެ.

އެޗް.ޑީ.ސީން ވިދާޅުވީ އެކުންފުންޏާއި، ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް (ޖީއެމްއައިޒެޑްއެލް) އެއްކޮށްލުމާގުޅިގެން ހުޅުމާލެ، ތިލަފުށި، ގުޅިފަޅު ހިމެނޭ ގޮތަށް ގްރޭޓަރ މާލޭ ސަރަހައްދު ތަރައްޤީކުރަން ކުރަންޖެހޭ އެންމެހައި މަސައްކަތްތައް ސަރުކާރުގެ މަޝްވަރާއާއި ލަފާގެ މަތިން ކުރަމުންދާކަމަށެވެ. އެގޮތުން، ތިލަފުއްޓާއި ގުޅީފަޅުން ބިންދޫކުރުމާއި ބިން ބޭނުންކުރަން އެކުލަވާލާފައިވާ އުސޫލުތަކާއި ގަވާއިދުތައް މުރާޖައާކުރުމުގެ މަސައްކަތް ކުރިއަށް ދާ ކަމަށް އެ ކުންފުނިން ބުންޏެވެ.

advertisement

މިވަގުތު ދޫކޮށްފައިވާ ބިންތަކުގެ މައްސަލަތައް ހައްލުކުރުމުގެ މަސައްކަތް ވެސް ކުރިއަށް ދާތީ ވަގުތީ ގޮތުންނާއި އެހެނިހެން ބޭނުންތަކަށް ބިން ދޫކުރުން ވަގުތީ ގޮތުން މެދުކަނޑާލަން ނިންމާފައިވާ ކަމަށް ވެސް އެ ބަޔާނުގައި ވަނީ ބުނެފަ އެވެ.

އެޗްޑީސީން ބުނީ ބިންތަކަށް އެދުމުގެ ފުރުސަތު އަލުން ހުޅުވާލާނީ އިތުރަށް ދޫކުރެވެން ހުރި ބިންތައް ދޫކުރުމަށް ކުރަން ޖެހޭ މަސައްކަތްތައް ނިމުމުން ކަމަށެވެ.

މާލީ ގޮތުންނާއި އަދި ހިންގުމުގައި ލިބޭނެ ފައިދާތަކަށް ރިޢާޔަތްކުރުމަށްފަހު ހުޅުމާލެ، ތިލަފުށި، ގުޅިފަޅު ހިމެނޭ ގޮތަށް ގްރޭޓަރ މާލޭ އޭރިއާ ތަރައްޤީކުރަން ކުރަންޖެހޭ އެންމެހައި މަސައްކަތްތައް އެއް ކުންފުންޏެއްގެ ދަށުން ކުރިއަށް ގެންދިއުމުގެ މަޤްޞަދުގައި ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް، އެޗްޑީސީއާއި ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް އެއްކޮށްލާފައިވަނީ މިދިޔަ އަހަރުގެ ސެޕްޓޭމްބަރު މަހުގެތެރޭގައެވެ.