ފައުޒާން ދެއްކީ ލާމަސީލު ނަމޫނާއެއް!

ފުވައްމުލަކު ސިޓީގައި މޫދަށް އެރިއުޅެނިކޮށް ގެނބިގެން ނިޔާވި އަޙްމަދު ފައުޒާން ޙަސަން އެންމެ ފަހު ވަގުތުވެސް ދެއްކި ހިތްވަރަށް ގިނަ ބަޔަކު ތަޢުރީފްކޮށްފިއެވެ.

އުމުރުން 17 އަހަރުގެ އަޙްމަދު ފައުޒާން ޙަސަން ގެނބިފައިވަނީ ފުވައްމުލަކު ސިޓީގެ މާނޭރެ އަތިރި ސަރަހައްދަށް މޫދަށް އެރި އުޅެނިކޮށް ގެނބެމުންދިޔަ ދެ ކުއްޖަކު ސަލާމަތް ކުރަން މަސައްކަތް ކުރުމުގެ ތެރޭގައި އިއްޔެގެ ވަގުތެއްގައެވެ.

advertisement

އެޑިޔުކޭޝަން މިނިސްޓަރ އައިޝަތު އަލީ ވިދާޅުވީ، އެންމެ ފަހު ވަގުތުގައިވެސް ފައުޒާން ދައްކައިދިނީ މަތިވެރި ހިތްވަރެއްކަމަށެވެ. މަރްޙޫމް ފައުޒާންއަށް ސުވަރުގޭގެ ދާއިމީ ނިޢުމަތް މިންވަރު ކުރައްވާ އާއިލާއަށް ކެތްތެރިކަން ދެއްވުމަށް އެދޭކަމަށް މިނިސްޓަރގެ ޓުވިޓުގައި ވަނީ ވިދާޅުވެފައެވެ.

ފައުޒާން ދުނިޔެ ދޫކުރުމާއި ގުޅިގެން ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވިޓެއްގައި ވިދާޅުވެފައިވަނީ މުޅި ފުއައްމުލައް ފަޚުރުވެރިވާ ދަރިއެއް ކަމުގައިވި ފައުޒާން ދުނިޔެދޫކޮށް އެދިޔައީ މުޅިއިންސާނިއްޔަތަށް ހިތްވަރާއި އޯގާތެރިކަމާއި ކުލުނުގެ ފުރިހަމަ ނަމޫނާއެއް ދައްކަދީފައިކަމަށެވެ.

އިއްޔެ ހިނގި ހާދިސާގައި ފައުޒާންގެ މަސައްކަތުން ގެނބެމުންދިޔަ ދެ ކުދިން ވަނީ ސަލާމަތް ކޮށްފައެވެ. ފައުޒާން ގެނބުނީ އެ ކުދިން ސަލާމަތް ކުރުމަށްފަހު އެނބުރި އެއްގަމަށް މިސްރާބު ޖަހަން އުޅެނިކޮށް އައި ރާޅެއްގެ ސަބަބުން ކަމަށް މަޢުލޫމާތު ލިބެއެވެ. ފައުޒާން ނިޔާވީ ފުވައްމުލަކު ސިޓީ ހޮސްޕިޓަލަށް ގެންގޮސް އަވަސް ފަރުވާ ދެމުން ދަނިކޮށެވެ.