އެއަރ އިންޑިއާއިން އިންޑިއާގެ އިތުރު 2 މަންޒިލަކުން ރާއްޖެއަށް ސީދާ ދަތުރު ފަށަނީ

އަންނަ މަހު އެއަރ އިންޑިއާއިން އިންޑިއާގެ އިތުރު 2 މަންޒިލަކުން ރާއްޖެއަށް ދަތުރުތައް ފެށުމަށް ތައްޔާރުވެއްޖެއެވެ. އެއަރ އިންޑިއާއިން މިހާރު ރާއްޖެއަށް ދަތުރުކުރަނީ ޓްރިވެންޑްރަމްއިން އެކަންޏެވެ. ނަމަވެސް ފެބްރުއަރީ މަހުގެ 5 ވަނަ ދުވަހުން ފެށިގެން އެއަރ އިންޑިއާއިން އިންޑިއާގެ ބެންގަލޫރާއި، ދިއްލީން ރާއްޖެއަށް ސީދާ ދަތުރުތައް ފަށާނެއެވެ. ކޯވިޑް19 އަށްފަހު އެއަރ އިންޑިއާގެ ދަތުރުތައް އަލުން ރާއްޖެއަށް ފަށާފައިވަނީ މިދިޔަ އޮގަސްޓް މަހުގެ 25 ވަނަ ދުވަހުއެވެ. އެއަރ އިންޑިއާ މެދުވެރިކޮށް އިންޑިއާއަށް ދަތުރުކުރަން ބޭނުންވާ ފަރާތްތަކަށް ވިލާ ޓްރެވެލްސް މެދުވެރިކޮށް ޓިކެޓް ނެގޭނެއެވެ. ދަތުރުކުރާ ކޮންމެ ފަސިންޖަރެއްގެ އަތުގައިވެސް 96 ގަޑިއިރު ހަމަނުވާ ކޯވިޑް19އަށް ޓެސްޓްކޮށްފައިވާކަން އަންގައިދޭ ލިޔުމެއް އޮންނަންޖެހޭނެއެވެ. އިންޑިއާއަކީ މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމެވެ. 2020 ވަނަ އަހަރު އިންޑިއާއިން ރާއްޖެއަށް 62905 ފަތުރުވެރިން ވަނީ ޒިޔާރަތްކޮށްފައެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއީ 2020 ވަނަ އަހަރު ރާއްޖެއަށް ޒިޔާރަތްކުރި ފަތުރުވެރިންގެ 11.3 އިންސައްތައެވެ. އަދި މިއަހަރުގެ ފުރަތަމަ 10 ދުވަހު އިންޑިއާއިން ރާއްޖެއަށް 3908 ފަތުރުވެރިން އައިސް އިންޑިއާ ވެފައިވަނީ މިއަހަރު ރާއްޖެއަށް 2 ވަނައަށް އެންމެ ގިނަ ފަތުރުވެރިން އައި ޤައުމުގެ ގޮތުގައެވެ.

advertisement