އިނގިރޭސިވިލާތުގެ ފަތުރުވެރިން ހަނީމޫން ހޭދަކުރަން އަންނަން ބޭނުންވަނީ ރާއްޖެއަށް

އިނގިރޭސިވިލާތުގެ ފަތުރުވެރިން ހަނީމޫން ހޭދަކުރަން އެންމެ މަޤްބޫލު މަންޒިލަކީ ރާއްޖެކަމަށް ދިރާސާއަކުން ދައްކައިފިއެވެ.
ނަރޑްވޮލެޓުން ކުރިއަށްގެންގޮސްފައިވާ މި ދިރާސާގައި ވަނީ 1000 ފަރާތަކުން ބައިވެރިވެފައެވެ. މި ދިރާސާގައި ބައިވެރިވި ގިނަ މީހުން ބުނެފައިވަނީ ހަނީމޫން ހޭދަކޮށްލަން ދާން އެންމެ ބޭނުންވާ މަންޒިލަކީ ރާއްޖެކަމަށެވެ. މި ލިސްޓުގައި ރާއްޖޭގެ އިތުރުން އިތުރު 4 މަންޒިލެއްވެސް ވާދަކުރެއެވެ. ލިސްޓުގެ 1 ވަނައިގައި ރާއްޖެ އޮތްއިރު 2 ވަނައިގައި އޮތީ ހަވާއީގެ މައުވީ އެވެ. 3 ވަނައިގައި ގްރީސްގެ ސެންޓޮރިނީ 4 ވަނަގައި އިޓަލީގެ ޕުލިއާ އަދި 5 ވަނައިގައި ހިމެނެނީ ޖަޕާންގެ ކިޔޯޓޯ އެވެ.
ރާއްޖެއަކީ އަބަދުވެސް ދުނިޔޭގެ އެކި ސަރަހައްދުތަކުގެ ފަތުރުވެރިންގެ މެދުގައި މަޤްބޫލު މަންޒިލެކެވެ. ޗުއްޓީ ހޭދަކުރަން މީހުން އެންމެ ގިނައިން ދާން ބޭނުންވާ މަންޒިލްތައް ހިމަނަގައިގެން “ކްލަބް މެޑް”އިން ގޫގުލް މެދުވެރިކޮށް ކުރިއަށްގެންދިޔަ ދިރާސާއަކުން މިއަހަރު އެންމެ ގިނަ ފަތުރުވެރިން އަންނަން ބޭނުންވާ ޤައުމުގެ 1 ވަނައިގައިވެސް ވަނީ ރާއްޖެ ހިމެނިފައެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިއަހަރުގެ ފުރަތަމަ 13 ދުވަހުގެ ތެރޭގައި އިނގިރޭސިވިލާތް ހިމެނެނީ ރާއްޖެއަށް އެންމެ ގިނައިން ފަތުރުވެރިން އައި 6 ވަނަ ޤައުމުގެ ތެރޭގައެވެ. އެގޮތުން އިނގިރޭސިވިލާތުން ރާއްޖެއަށް 1494 ފަތުރުވެރިން ވަނީ ރާއްޖެ އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

advertisement