ރީޖަނަލް އެއަރޕޯޓް ކޮމްޕެނީގެ ބޯޑު އެކުލަވާލައިފި

ރީޖަނަލް އެއަރޕޯޓް ކޮމްޕެނީގެ ބޯޑު އެކުލަވާލައިފިއެވެ. ރީޖަނަލް އެއަރޕޯޓް ކޮމްޕެނީގެ ބޯޑު އެކުލަވާލައި، އެކުންފުނީގެ މެނޭޖިންގ ޑިރެކްޓަރުގެ މަޤާމަށް އައްޔަންކޮށްފައިވަނީ ކުރިން އައިލެންޑް އޭވިއޭޝަންގެ މެނޭޖިންގ ޑިރެކްޓަރަކަށް ހުންނެވި މުޙައްމަދު ރިޒްވީއެވެ. އަދި ޗެއަރމަންއަކަށް ހަމަޖައްސާފައިވަނީ އަބްދުއްލަތީފް ޤާސިމްއެވެ. ކުންފުނީގެ ޑިރެކްޓަރުންގެ ބޯޑުގައި ދެން ތިއްބަވަނީ މުހައްމަދު ފިރުޒުލްއާއި، މުހައްމަދު ޝަފާއު ހުސައިން، ހުސައިން ޝާމިން އަދި އަބްދުﷲ ވަހީދުއެވެ.
“ރީޖަނަލް އެއަރޕޯޓްސް ކޮމްޕެނީ ލިމިޓެޑް” އަކީ މިދިޔަ ސެޕްޓެމްބަރުމަހުގެ ތެރޭގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އުފެއްދެވި ކުންފުންޏެކެވެ. މިއީ ސައްތައިން ސައްތަ ސަރުކާރު ހިއްސާވާ ކުންފުންޏެކެވެ. މި ކުންފުންޏަކީ ސަރުކާރުން ހިންގަމުން ގެންދަވާ ސަރަޙައްދީ އެއަރޕޯޓްތައް ވިޔަފާރީގެ އުޞޫލުން ހިންގުމަށާއި، ސަރުކާރުން ރީޖަނަލް އެއަރޕޯޓްސް މެދުވެރިކޮށް ހިންގަމުން ގެންދަވާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްޤީކޮށް ހިންގުމަށްޓަކައި އުފެއްދެވި ކުންފުންޏެކެވެ. ރާއްޖޭގައި 17 އެއަރޕޯޓެއް އޮތްއިރު 7 އެއަރޕޯޓް ހިންގަނީ ރީޖަނަލް އެއަޕޯޓްސްގެ ދަށުންނެވެ.

advertisement