އެއްވެސް މަޝްރޫއެއްގެ ކޮންޓްރެކްޓަރަކަށް ފައިސާ ދޫނުކޮށް ނޯންނާނެ – ފެނަކަ

ފެނަކަ ކޯޕަރޭޝަނުގެ އެއްވެސް މަޝްރޫޢެއްގެ ކޮންޓްރެކްޓަރަކަށް ހަމަޖެހިފައިވާ އުސޫލުން ފައިސާ ދޫނުކޮށް ނޯންނާނެކަމަށް އެކޯޕަރޭޝަނުން ވިދާޅުވެއްޖެއެވެ.
ފެނަކައިން މިހެން ބުނީ އެ ކުންފުނިން ބައެއް ކޮންޓްރެކްޓަރުންނަށް މަސައްކަތުގެ ފައިސާ ނުދީ ހިފަހައްޓާފައިވާކަމަށްބުނެ މީޑިއާއެއްގައި ޢާއްމުކޮށްފައިވާ ޚަބަރަކާގުޅިގެން ނެރުނު ނޫސްބަޔާނެއްގައެވެ.
ފެނަކައިން ނެރެފައިވާ ނޫސްބަޔާނުގައި ބުނެފައިވަނީ އެކުންފުންޏާއެކު، އެއްބަސްވުމެއްގެ ދަށުން ކުރެވޭ މަސައްކަތެއްގައި، ކޮންމެ ކޮންޓްރެކްޓަރަކަށްވެސް ލިބިދޭންޖެހޭ ފައިސާ އެއެއްބަސްވުމެއްގެ ރޫޙާއި އެއްގޮތްވާގޮތަށް ނުދީ ނޯންނާނެކަމަށެވެ.
ފެނަކަ ކޯޕަރޭޝަނުންވަނީ މަދު ކޮންޓްރެކްޓަރުންގެ ފަރާތުން ލިބުނު މައުލޫމާތަކަށް ބަލައި ފެނަކައިގެ ބަހެއް ނުހޯދައި ހަޤީޤަތް އޮޅޭ މަޢުލޫމާތެއް އާއްމުކުރުމަކީ ޒިންމާދާރުކަން ކުޑަ ކަމެއްގެ ގޮތުގައި ސިފަކުރައްވާފައެވެ. އަދި މިއީ ރައްޔިތުންގެ މެދުގައި ފެނަކަ ކޯޕަރޭޝަންއާއި މެދުގައި ޝައްކާއި ވަހުމު އުފެއްދުމުގެ އިތުރުން ކުންފުނީގެ ނަން ކިލަނބުކުރުމަށް ކުރި ނާތަހުޒީބު ފިނޑި އަމަލެއްކަމަށްވެސް އެ ކޯޕަރޭޝަންގެ ބަޔާނުގައި ވެއެވެ..

އެ ކުންފުނިން ވަނީ މިފަދަ ޒިންމާދާރު ކުޑަކޮށް މަސައްކަތް ކުރާ ހަބަރު ފަތުރާ ވަސީލަތްތަކުން ޝާއިއު ކުރާ ހަގީގަތެއް ނެތް ވާހަކައަކުން އިހުލާސްތެރިކަމާއި، ތެދުވެރިކަމާ، އަމާނާތްތެރި ކަމާއެކު ރައްޔިތުންނަށް ދެމުންދާ އަސާސީ ހިދުމަތްތައް ފޯރުކޮށްދިނުމުގައި ފަސްނުޖެހި މަސައްކަތް ކުރާނެ ކަމަށް ބުނެފައެވެ.

advertisement