ބައިނަލްއަޤްވާމީ 26 އެއަރލައިނަކުން ވަނީ އަލުން ރާއްޖެއަށް ދަތުރު ފަށާފައި

ބައިނަލްއަޤްވާމީ 26 އެއަރލައިންއަކުން މިހާރު ރާއްޖެއަށް ދަތުރުތައް ބާއްވަމުންދާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ ‘މޯލްޑިވްސް ޓޫރިޒަމް އަޕްޑޭޓްސް’ ރިޕޯޓުގައިވާގޮތުން ކޯވިޑް19 އަށްފަހު ރާއްޖޭގެ ބޯޑަރު އަލުން ހުޅުވާލުމާއިއެކު މިހާތަނަށް 26 އެއަރލައިންއަކުން ވަނީ ރާއްޖެއަށް ދަތުރުތައް ފަށާފައެވެ.
ރާއްޖެއަށް ދަތުރުތައް ބާއްވަމުންދާ އެއަރލައިންތަކުގެ ތެރޭގައި ދުނިޔޭގެ މަޝްހޫރު ބޮޑެތި އެއަރލައިންތައްވެސް ހިމެނެއެވެ. ރާއްޖެއަށް އަލުން ދަތުރުފެށި އެއަރލައިންތަކުގެ ތެރޭގައި ހިމެނެނީ، ބްރިޓިޝް އެއަރވޭސް، އެޑަލްވެއިސް، ލުފްތަންސާ، އަޒުރު އެއަރ ރަޝިއާ، ޓާކިޝް އެއަރވޭސް، ޤަތަރު އެއަރވޭސް، ފްލައި ދުބާއީ، އެމިރޭޓްސް، އިއްތިހާދު އެއަރވޭސް، ގޯއެއަރ، އިންޑިގޯ، އެއަރ އިންޑިއާ، ސްރީލަންކަން އެއަރލައިންއެވެ. މީގެއިތުރުން އޭރޯފްލޮޓް، ސްޕައިސްޖެޓް، އަޒުރު އެއަރ ޔޫކްރެއިން، އެއަރ އަސްތާނާ، އެއަރ ސީޝެލްސް، ސިލްކް އެއަރ، އެއަރ ފްރާންސް، ގަލްފް އެއަރ، އޮސްޓްރިއަން އެއަރލައިން، ކޮންޑޯ، އެއަރ ވިސްޓަރާ، އުޒްބެކިސްތާން އެއަރވޭސް، އަދި ޔޫކްރެއިން އިންޓަނޭޝަނަލް އެއަރލައިނުންވެސް މިހާރު ވަނީ މިހާރު ރާއްޖެއަށް ދަތުރުފަށާފައެވެ.

ރާއްޖޭގެ ބޯޑަރު އަލުން ހުޅުވާލުމާއިއެކު އެއަރލައިންތަކުގެ ޝައުޤުވެރިކަން ރާއްޖެއަށް އިތުރުކުރުމަށް ގިނަ މަސައްކަތްތަކެއް ކުރިއަށްގެންގޮސްފައެވެ. އެގޮތުން ރާއްޖެ އަންނަ އެއަރލައިންތަކަށް ގްރައުންޑް ހޭންޑްލިންއާއި، ލޭންޑިން ޗާޖަސްގެ އިތުރުން ނެވިގޭޝަން ޕާކިން ޗާޖުން ބޮޑު ޑިސްކައުންޓެއްވެސް ވަނީ ދީފައެވެ. އަދި ރާއްޖެއިން ކޯވިޑް19 އާއި ދެކޮޅަށް އަޅާފައިވާ ފިޔަވަޅުތަކުގެ ސަބަބުން ކޯވިޑްގެ ކޭސްތައް ފެންނަން މިންވަރު ދަށްވެފައިވުމަކީވެސް އެއަރލައިންތަކުން އަލުން ރާއްޖެއަށް ދަތުރުފެށި އެއް ސަބަބެވެ.

advertisement