އައްޑޫގައި ރޭންޑަމް ސާމްޕަލް ނަގަނީ

މިއަދުން ފެށިގެން އައްޑޫގައި ރޭންޑަމް ސާމްޕަލް ނަގަން ފަށާނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ އައްޑޫގައި ރޭންޑަމް ސާމްޕަލް ނަގާނީ ފެރީތަކުގައި މަސައްކަތްކުރާ މީހުންނާއި ފިހާރަތަކުގައި ސޭޓުންނަށް ކަމަށެވެ. އައްޑޫގައި ރޭންޑަމް ސާންޕަލް ނަގަން ފަށަން އެޗްޕީއޭއިން ނިންމާފައިމިވަނީ އަތޮޅުތެރޭގެ ބައެއް ރަށްރަށުގައި ކޯވިޑްގެ ކޭސްތައް ގިނަވެފައިވާ ދަނޑިވަޅެއްގައެވެ. އެގޮތުން ގއ. އަތޮޅުގެ ބައެއް ރަށްތަކާއި ލ. އަތޮޅުގެ ބައެއް ރަށްތަކުން ކޮވިޑްގެ ކޭސްތައް މިހާރު ވަނީ ފެނިފައެވެ. މި ސަރަހައްދުތަކުން އައްޑޫއަށް ފެރީގެ ޙިދުމަތްވެސް ދެއެވެ.
ގއ. ދެއްވަދޫގައި މިހާތަނަށް 54 މީހަކު ވަނީ ޕޮޒިޓިވް ވެފަ އެވެ. އެރަށާ ގުޅިފައިވާ ކްލަސްޓާގެ ކޭސްތަކުގެ އަދަދު މިހާރު 60 އަށް ވުރެ ގިނަ އެވެ.
އަތޮޅުތަކުގެ ރަށްތަކުން ކޯވިޑްގެ ކޭސްތައް ފެންނަމުން ދިއުމާއި ގުޅިގެން އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް އެޅުމަށް އާންމުންނަށް އިރުޝާދުދީފައެވެ. އެގޮތުން އިޖްތިމާއީ ގައިދުރުކަން ބެހެއްޓުމާއި، ބޭރަށް ނިކުންނައިރު މާސްކް އެޅުން ހިމެނެއެވެ.

advertisement