ޔޫއެންޑަބްލިއުޓީއޯގެ “ގްލޯބަލް ޓޫރިޒަމް ކްރައިސިސް ކޮމިޓީ” ގައި ރާއްޖެއިން ބައިވެރިވެއްޖެ

ޔޫއެންޑަބްލިއުޓީއޯގެ “ގްލޯބަލް ޓޫރިޒަމް ކްރައިސިސް ކޮމިޓީ” ގެ 8 ވަނަ ބައްދަލުވުމުގައި ރާއްޖެއިން ބައިވެރިވެއްޖެއެވެ.

ޔޫއެންޑަބްލިއުޓީއޯގެ “ގްލޯބަލް ޓޫރިޒަމް ކްރައިސިސް ކޮމިޓީ” ގެ ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގެންނެވީ ޔޫއެންޑަބްލިއުޓީއޯ ކޮމިޝަން އޮފް ސައުތު އޭޝިއާގެ މިހާރުގެ ޗެއަރގެ ހައިސިއްޔަތުން ޓޫރިޒަމް މިނިސްޓަރ ޑރ. އަބްދުﷲ މައުސޫމްއެވެ. މި ބައްދަލުވުން ބާއްވާފައިވަނީ މިމަހުގެ 18 ވަނަ ދުވަހު ސްޕެއިންގެ މެޑްރިޑްގައެވެ.

advertisement

މި ބައްދަލުވުމުގެ މައިގަނޑު ތީމްއަކީ ދުނިޔޭގެ ފަތުރުވެރިކަމަށް ކޯވިޑް އާއި ގުޅިގެން ދިމާވެފައިވާ ގޮންޖެހުންތަކުން ހައްލެއް ހޯދައި، ފަތުރުވެރިކަން އަލުން ފެށުމެވެ. އެގޮތުން މިހާރު ތައާރަފްކުރަމުންދާ ވެކްސިން އާބާދީގެ ބޮޑުބަޔަކަށް ބޭނުންކުރެވި ވެކްސިން ޖެހިކަމުގެ ސެޓްފިކެޓް ހިފައިގެން އެއްގައުމުން އަނެއްގައުމަށް ދަތުރުކުރެވޭނެ މަގުފަހިވުމަކީ ފަތުރުވެރިކަން އަލުން ފެށުމަށް ކޮންމެހެންވެސް ބޭނުންކަމެއްގެ ގޮތުގައި ބައްދަލުވުމުގައި ގިނަ މެންބަރުން ވަނީ ފާހަގަކޮށްފައެވެ.

މި ކޮމެޓީއަކީ ކޯވިޑް19 އާއި ގުޅިގެން ދުނިޔޭގެ އެކި ޤައުމުތަކުގެ ފަތުރުވެރިކަމަށް ދިމާވާނެ ކަންކަން ދިރާސާކޮށް ޖުމްލަ ހައްލެއް ގެނައުމަށްޓަކައި ޔޫއެންޑަބްލިއުޓީއޯއިން އެކުލަވާލި ކޮމިޓީއެކެވެ.