ރާއްޖެ ގެންނަނީ އެކްސްޓްރާޒެނެކާ ވެކްސިންގެ 7 ލައްކަ ޑޯޒް

އިނގިރޭސިވިލާތުގެ އޮކްސްފަޑް ޔުނިވާސިޓީ އާއި އެސްޓްރާޒެނެކާ ކުންފުނިން އުފައްދާފައިވާ ވެކްސިންގެ ހަތް ލައްކަ ޑޯޒް ރާއްޖެއަށް ހޯދޭނެކަމަށް ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ފާތިމަތު ނަޒްލާ ރަފީގު ހާމަކުރައްވައިފި އެވެ.
ދިވެހި ސަރުކާރުން އެސްޓްރާޒެނެކާގެ ވެކްސިން ގަތުމަށް ނިންމާފައިވާކަން ފިނޭންސް މިނިސްޓްރީން ހާމަކުރައްވާފައިވަނީ މިދިޔަމަހުގެ 31 ވަނަ ދުވަހުއެވެ.
އެކްސްޓްރާޒެނެކާގެ މިވެކްސިނަކީ މިވަގުތު ތައްޔާރުކޮށްފައިވާ ވެކްސިންތަކުގެ ތެރެއިން އެންމެ އެކަށޭނެ އަދި ރައްކާކުރުމަށް އެންމެ ފަހި ވެކްސިން ކަމުގައި ދުނިޔޭގެ ގިނަ ޤައުމުތަކުންވެސް ފާހަގަކުރެއެވެ. އެގޮތުން މިވެކްސިންއާއި އެންމެ ވާދަވެރިކޮށް ބާޒާރަށް ނެރުމަށް މަސައްކަތްކުރަމުން އަންނަ ފައިޒާ ވެކްސިންއާއި ޚިލާފަށް، މިވެކްސިން ޢާއްމު ޓެމްޕަރޭޗަރގައި ރައްކާކުރެވެއެވެ.
ޕީއެސްއެމް ނިއުސްގެ ލައިވް ޕްރޮގްރާމެއްގައި ވާހަކަދައްކަވަމުން ޑރ. ނަޒްލާ ވިދާޅުވީ އިންޑިއާ އިން ހިލޭ ދޭ ވެކްސިންގެ އެއް ލައްކަ ޑޯޒްގެ އިތުރުންވެސް ވެކްސިން ހޯދުމަށް ކުރެވޭ އިތުރު މަސައްކަތްތަކުގެ ދަށުން، އެސްޓްރާޒެނެކާ ކުންފުނިން އުފައްދާފައިވާ ވެކްސިން ގަތުމަށް އެއްބަސްވުމުގައި މިހާރު ސޮއި ކޮށްފައިވާއިރު، އެ އެއްބަސްވުމުގެ ދަށުން ހަތް ލައްކަ ޑޯޒް ހޯދޭނެކަމަށެވެ.
ރާއްޖެއަށް ކޯވިޑް-19ގެ ވެކްސިންގެ ފުރަތަމަ ޝިޕްމަންޓް މިހާރު ރާއްޖެ ގެނެސްފައިވާއިރު، އިންޑިއާއިން ހަދިޔާކުރި “ކޮވިޝީލްޑް” ވެކްސިނަކީ އިނގިރޭސިވިލާތުގެ އޮކްސްފޯޑް ޔުނިވަރސިޓީއާއި އެކްސްޓްރާޒެނެކާގެ ރިސަރޗްގެ މައްޗަށް ބިނާކޮށް އިންޑިއާގެ ސެރަމް އިންސްޓިޓިއުޓް އޮފް އިންޑިއާ، އެސް.އައި.އައި ކުންފުނިން އުފައްދާ ވެކްސިނެކެވެ. ކޮވިޝީލްޑް ވެކްސިނަކީ ޑަބްލިއު.އެޗް.އޯއިން އެކުލަވާލާފައިވާ ކޯވެކްސް ފެސިލިޓީގެ ތެރެއިން ޤައުމުތަކަށް ދޫކުރުމަށް ހުއްދަދީފައިވާ ވެކްސިނެއް ނަމަވެސް، އިންޑިއާއިން ހަދިޔާކުރި ވެކްސިން ޝިޕްމަންޓަކީ، ސީދާ އެ ފެސިލިޓީގެ ތެރެއިން ހަދިޔާކޮށްފައިވާ ވެކްސިނެއްނޫންކަމަށް ޑރ. ނަޒްލާ ވިދާޅުވިއެވެ.
ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯ އިސްވެ ފަށާފައިވާ ކޮވެކްސް ފެސިލިޓީގެ ދަށުން ރާއްޖޭގެ އާބާދީގެ 20 ޕަސަންޓަށް ހިލޭ ވެކްސިން ލިބޭނެކަމަށްވެސް އެޗްއީއޯސީން ވިދާޅުވެއެވެ.

advertisement