މިދިޔަ އަހަރު އެމްޓީސީސީއަށް ބޮޑު އާމްދަނީއެއް

ހުސްވި 2020 ވަނަ އަހަރު އެމްޓީސީސީއަށް ރިކޯޑު އަދަދެއްގެ އާމްދަނީއެއް ލިބިފައިވާކަމަށް އެ ކުންފުނިން ބުނެފިއެވެ.

އެމްޓީސީސީއަށް މިދިޔަ އަހަރު ޓެކުހަށް ކެނޑުމުގެ ކުރިން 203.11 މިލިއަން ރުފިޔާ ފައިދާގެ ގޮތުގައި ލިބުނުއިރު، އޭގެ ކުރީ އަހަރު ލިބުނީ 63.08 މިލިއަން ރުފިޔާ އެވެ. އަދި މިދިޔަ އަހަރު ވިޔަފާރިކޮށްގެން އާމްދަނީގެ ގޮތުގައި 1.35 ބިލިއަން ރުފިޔާ ލިބުނުއިރު، 2019ވަނަ އަހަރު ލިބުނީ 1.14 ބިލިއަން ރުފިޔާ އެވެ.

advertisement

މިދިޔަ އަހަރު ސާފު ފައިދާގެ ގޮތުގައި އެމްޓީސީސީއަށް ލިބުނީ 172.6 މިލިއަން ރުފިޔާ އެވެ. އަދި އޭގެ ކުރީ އަހަރު ލިބުނީ 52.8 މިލިއަން ރުފިޔާ އެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވީ މިދިޔަ އަހަރަކީ އެމްޓީސީސީގެ 40 އަހަރުގެ ހަޔާތުގައި އެންމެ ބޮޑު ކާމިޔާބީއެއް ލިބުނު އަހަރުކަމަށެވެ. އެމްޓީސީސީއަށް މިދިޔަ އަހަރު އެންމެ ބޮޑު އާމްދަނީއެއް ލިބިފައިވަނީ މެރިން ކޮންސްޓްރަކްޝަންގެ ދާއިރާއިންކަމަށް އާޒިމް ވިދާޅުވިއެވެ. އެއްފަހަރާ 40 ރަށުގައި މަސައްކަތް މިހާރު އެ ކުންފުންޏަށް ކުރެވެއެވެ. މިދިޔަ އަހަރު އެމްޓީސީސީއަށް އެންމެ ބޮޑު އާމްދަނީއަކާއި ސާފު ފައިދާއެއްވެސް ލިބިފައިވަނީ ހަތަރުވަނަ ކުއާޓަރުގަ އެވެ. ހަތަރުވަނަ ކުއާޓަރުގެ މާލީ ހިސާބުތަކަށް ވަކިން ބަލާއިރު އާމްދަނީގެ ގޮތުގައި ލިބުނީ 400 މިލިއަން ރުފިޔާ، އަދި ސާފު ފައިދާގެ ގޮތުގައި 53.4 މިލިއަން ރުފިޔާ ވަނީ ލިބިފައެވެ.