އިތާފުށިން މުވައްޒަފުންނަށް ސަރވިސް ޗާޖުގެ ގޮތުގައި ބައިލައްކަ ރުފިޔާ

މާލެ އަތޮޅުގައި ހިންގާ “ވޯލްޑޯފް އެސްޓޯރިއާ މޯލްޑިވްސް އިތާފުށި” ރިސޯޓްގެ މުވައްޒަފުންނަށް މިދިޔަމަހުގެ ސަރވިސް ޗާޖުގެ ގޮތުގައި ބައިލައްކައަށްވުރެ ގިނަ ރުފިޔާ ދީފިއެވެ.
ރިސޯޓް ވޯކާރސް މޯލްޑިވްސްއިން އާއްމުކޮށްފައިވާ މައުލޫމާތުތައް ދައްކާގޮތުން އިތާފުށީގެ މުވައްޒަފުންނަށް ޖެނުއަރީމަހުގެ ސަރވިސް ޗާޖުގެ ގޮތުގައި 3340 ޑޮލަރު ވަނީ ދީފައެވެ. މިއީ ދިވެހި ރުފިޔާއިން ބަލާނަމަ 51502 ރުފިޔާއެވެ.

އިތާފުށީގެ އިތުރުން ޖަނަވަރީ މަހު ބޮޑެތި އަދަދުން ސަރވިސް ޗާޖު ދިން އެހެން ރިސޯޓްތަކަށް ބަލާލާއިރު، ވަން އެންޑް އޮންލީ ރީތި ރަށް ރިސޯޓުން ޖެނުއަރީމަހުގެ ސަރވިސް ޗާޖުގެ ގޮތުގައި ދީފައިވަނީ ކޮންމެ މުވައްޒަފަކަށް 3007 ޑޮލަރުއެވެ. އަންނަތަރާ ކިހަވަށް މޯލްޑިވްސްއިން ކޮންމެ މުވައްޒަފަކަށް 2097 ޑޮލަރު ސަރވިސް ޗާޖުގެ ގޮތުގައި ވަނީ ދީފައެވެ.
މާލެ އަތޮޅުގައި ތަރައްޤީކޮށްފައިވާ “ވޮލްޑޯފް އެސްޓޯރިއާ މޯލްޑިވްސް އިތާފުށި” ރިސޯޓު ހުޅުވާފައިވަނީ 2019 ވަނަ އަހަރުގެ ޖުލައިމަހުގެ ތެރޭގައެވެ. މި ރިސޯޓަކީ މަޝްހޫރު ހިލްޓަން ބްރޭންޑުގެ ދަށުން ހިންގާ ލަގްޒަރީ ރިސޯޓް ބްރޭންޑެއްކަމަށްވާ ވޮލްޑޯފް އެސްޓޯރިއާއިން ތަރައްޤީކުރި ރިސޯޓެކެވެ. ރިސޯޓްތަކުން މުވައްޒަފުންނަށް ދެމުންދާ ސަރވިސް ޗާޖުގެ އަދަދު އިތުރުވަމުން އައުމަކީ ރާއްޖޭގެ ފަތުރުވެރިކަން ކުރިއަރަމުން އަންނަކަމުގެ ހެއްކެކެވެ. ސަރވިސް ޗާޖުގެ ގޮތުގައި ބައެއް ރިސޯޓްތަކުން މުވައްޒަފުންނަށް ރަނގަޅު އަދަދެއްގެ އާމްދަނީއެއް ދެމުންދާއިރު، ބައެއް ރިސޯޓްތަކުން ސަރވިސް ޗާޖު ނުދޭ މައްސަލަތައްވެސް ރިސޯޓް މުވައްޒަފުން ކުރެއެވެ.

advertisement