ކެނޑިޑޭޓުންގެ ނަން ނެގުމުގެ އެންމެ ފަހު ތާރީހަކީ އަންނަ މަހުގެ 11 – އިލެކްޝަން

ލޯކަލް ކައުންސިލްތަކާއި އަންހެނުން ތަރައްޤީއަށް މަސައްކަތްކުރާ ކޮމެޓީތަކަށް ކުރިމަތިލާފައިވާ ކެނޑިޑޭޓުންގެ ނަން އަނބުރާ ގެންދެވޭނެ އެންމެ ފަހު ތާރީޚަކީ އަންނަމަހުގެ 11 ވަނަ ދުވަސްކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަންސް ކޮމިޝަނުން ވިދާޅުވީ އިންތިޚާބުގައި ވާދަކުރާ ކެނޑިޑޭޓުންގެ ނަން އަނބުރާ ގެންދެވޭނެ އެންމެ ފަހު ތާރީހަކީ އަންނަ ފެބްރުއަރީ މަހުގެ 11 ވަނަދުވަސްކަމަށެވެ. އަދި އެދުވަހުގެ 14:00ގެ ފަހުން އެއްވެސް ކެނޑިޑޭޓަކަށް ނަން އަނބުރާ ނުނެގޭނެކަމަށް އެ ކޮމިޝަނުން ވިދާޅުވެއެވެ.

އިލެކްޝަންސް ކޮމިޝަނުން މިދިޔަ ހަފްތާގައި އާއްމުކުރި ތާފާސް ހިސާބުތައް ދައްކާގޮތުން ކައުންސިލް އިންތިޚާބުގައި ވާދަކުރާ ކެނޑިޑޭޓުންގެ ތެރެއިން 100 ނަމެއް ވަނީ އަނބުރާ ނަގާފައެވެ. އެންމެ ގިނައިން ނަން ނަގާފައިވަނީ ކައުންސިލްތަކުން އަންހެންނުނަށް ހާއްސަކުރި 370 ގޮނޑިއަށް ކުރިމަތިލީ ކެނޑިޑޭޓުންނެވެ. މި ގޮނޑިތަކަށް ކުރިމަތިލީ 41 މީހަކު ވަނީ ނަން ނަގާފައެވެ.
ދެން އެންމެ ގިނައި ނަން ނަގާފައިވަނީ ކައުންސިލްތަކަށް ކުރިމަތިލީ ކެނޑިޑޭޓުންގެ ތެރެއިންނެވެ. މިގޮތުން ކައުންސިލްތަކަށް ކުރިމަތިލީ 923 މީހުންގެ ތެރެއިން މިހާތަނަށް 37 މީހަކު ވަނީ ނަން ނަގާފައެވެ.
ސިޓީ ކައުންސިލުން އަންހެނުންނަށް ހާއްސަ ކުރި ގޮނޑތަކަށް 14 މީހުން ހޮވަންޖެހޭއިރު މި ގޮނޑިތަކެއް ވާދަކުރަން ނިންމި ދެ ކެނޑިޑޭޓަކުވެސް ވަނީ ނަން އަނބުރާ ނަގާފައެވެ. ލޯކަލް ކައުންސިލްތަކުގެ އިންތިޚާބު ބޭއްވުމަށް މިހާރު ތާވަލްކޮށްފައިވަނީ އަންނަ އޭޕްރިލްމަހުގެ 10 ވަނަ ދުވަހެވެ. ކޯވިޑް19 ގެ ސަބަބުން ކައުންސިލް އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިހާބު ވަނީ ވަރަށް ބޮޑަށްވެސް ފަސްވެފައެވެ.

advertisement