ޒުވާން ވިޔަފާރިވެރިން އުފެއްދުމަށް ބީސީސީ އިން ޕިޗް މުބާރާތެއް ބާއްވަނީ

ޒުވާން ވިޔަފާރިވެރިން އުފެއްދުމަށް ބިޒްނަސް ސެންޓަރ ކޯޕަރޭޝަނުން ބިޒްނަސް ޕިޗް ކޮމްޕެޓިޝަން ބޭއްވުމަށް ތައްޔާރުވެއްޖެއެވެ. މިއީ ބިސީސީއާއި އިކޮނޮމިކް މިނިސްޓްރީ ގުޅިގެން ކުރިއަށްގެންދާ ޕްރޮގްރާމެކެވެ.

ބީސީސީން ބުނީ މިއީ ޒުވާނުންގެ ތެރެއިން ވިޔަފާރިއަށް ޝައުގުވެރިކަން ހުރި ޒުވާނުންނަށް ޚާއްސަކޮށްގެން ހުޅުވާލާ ފުރުސަތެއްކަމަށެވެ. ކޯވިޑް-19ގެ ހާލަތުގެ ސަބަބުން ރާއްޖޭގެ އިޤްތިޞާދަށް ދިމާވެފައިވާ ހިރާސްތައް ނައްތާލައި އިޤްތިޞާދީ ދުވެލި ހަލުވިކުރުމަކީވެސް މި މުބާރާތުގެ މަޤްސަދެކެވެ.

advertisement

ޕިޗް ކޮމްޕެޓިޝަންއަކީ ޢުމުރުން 18 އަހަރާއި 35 އަހަރާ ދެމެދުގެ ޒުވާނުންނަށް އަމާޒުކޮށް ކުރިޔަށްގެންދާ ޕްރޮޖެކްޓެކެވެ. މި ޕްރޮޖެކްޓުގައި ވަކިވަކިން ނުވަތަ ޓީމެއްގެ ގޮތުގައިވެސް ބައިވެރިވެވޭނެކަމަށް ބީސީސީން ވިދާޅުވެއެވެ. ޕިޗް ކޮމްޕެޓިޝަނުގައި ރާއްޖޭގެ ހުރިހާ ހިސާބަކުންވެސް ބައިވެރިވެވޭނެއެވެ.

މި ޕްރޮޖެކްޓުގެ ތެރެއިން ތަފާތު ދާއިރާތަކުން ވިޔަފާރީގެ ޚިޔާލު ހުށަހެޅުމުގެ ފުރުޞަތު ވަނީ ހުޅުވާލާފައެވެ. ޕިޗް ކޮމްޕެޓިޝަންގެ ދަށުން 300 ޒުވާނަކަށް ވިޔަފާރިގައި އެހީތެރިކަން ފޯރުކޮށްދިނުމަށް ނިންމާފައިވާކަމަށް ބީސީސީން ބުނެއެވެ.

ޒުވާން ވިޔަފާރިވެރިންނަށް ފަހި ފުރުސަތުތައް ހޯދައިދިނުމަށް ބީސީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ބީސީސީގެ ފިހާރަތަކުގައި ދިވެހި އުފެއްދުންތައް ވިއްކުމުގެ ފުރުސަތުވެސް ވަނީ ފަހިކޮށްދީފައެވެ.