ވަނަ އަހަރު ރާއްޖެ އައި ބައިނަލްއަޤްވާމީ 2020 ފްލައިޓްތަކުގެ އަދަދު ދަށް

މިދިޔަ އަހަރު ވެލާނާ އިންޓަނޭޝަނަލް އެއަރޕޯޓަށް ބައިނަލްއަޤްވާމީ 9856 ފްލައިޓް ޖައްސާފައިވާކަމަށް ތަފާސް ހިސާބުތަކުން ދައްކައިފިއެވެ.

މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން އާއްމުކޮށްފައިވާ ތަފާސް ހިސާބުތަކުން ދައްކާގޮތުން 2019 ވަނަ އަހަރު ރާއްޖެއަށް ބައިނަލްއަޤްވާމީ 13781 ފްލައިޓް ވަނީ އައިސްފައެވެ. ނަމަވެސް މިދިޔަ އަހަރު ރާއްޖެ އައިސްފައިވަނީ 5896 ފްލައިޓެވެ. އެހެންކަމުން 2019 ވަނަ އަހަރާއި އަޅާބަލާއިރު 2020 ވަނަ އަހަރު ރާއްޖެއައި ބައިނަލްއަޤްވާމީ ފްލައިޓްތައް ވަނީ ދަށްވެފައެވެ.

advertisement

މިދިޔަ އަހަރު ރާއްޖެ އައި ފްލައިޓްތަކުގެ ޖުމްލަ އަދަދު ދަށްވި ނަމަވެސް 2019 ވަނަ އަހަރާއި އަޅާބަލާ މިދިޔަ އަހަރު ރާއްޖެއައި ފްރައިވެޓް ޖެޓްތަކާއި، ޗާޓަރ ފްލައިޓްތައް ވަނީ އިތުރުވެފައެވެ. އެމްއެމްއޭގެ ތަފާސް ހިސާބުތައް ދައްކާގޮތުން 2019 ވަނަ އަހަރު ޕްރައިވެޓް ޖެޓްތަކާއި، ޗާޓަރު ފްލައިޓްގެ ގޮތުގައި ރާއްޖެ އައިސްފައިވަނީ 981 ފްލައިޓެވެ. ނަމަވެސް 2020 ވަނަ އަހަރު މި އަދަދު ވަނީ 1101 ފްލައިޓަށް އިތުރުވެފައެވެ. މިއަދަދު އިތުރުވުމުގެ މައިގަނޑު ސަބަބެއްކަމަށް ބެލެވެނީ ކޯވިޑް19 ގެ ސަބަބުން މީހުންގެ އާމްދަނީއަށް އަސަރުކޮށް ގިނަ އަދަދެއްގެ މުއްސަނދިން ރާއްޖެ އައުމެވެ. އަދި ފްލައިޓްތަކުގެ ބަދަލުގައި ރައްކާތެރިކަމަށްޓަކައި ޕްރައިވެޓް ޖެޓްތަކުގައި އައި މީހުންގެ އަދަދު އިތުރުވުމެވެ.

ޕްރައިވެޓް ޖެޓްތަކާއި، ޗާޓަރު ފްލައިޓްތައް އިތުރުވިނަމަވެސް ޝެޑިއުލްކޮށްގެން ރާއްޖެ އައި ފްލައިޓްތައް ދަށްކަމަށް އެމްއެމްއޭގެ ތަފާސް ހިސާބުތަކުން ދައްކައެވެ. 2019 ވަނަ އަހަރު ޝެޑިއުލް 12800 ފްލައިޓް ރާއްޖެ އައިއިރު، 2020 ވަނަ އަހަރު ރާއްޖެ އައީ 4795 ފްލައިޓެވެ.

ރާއްޖެއައި ބައިނަލްއަޤްވާމީ ފްލައިޓްތަކުގެ އަދަދު މިދިޔަ އަހަރު ދަށްވެފައިވަނީ ކޯވިޑް19ގެ ސަބަބުން ރާއްޖޭގެ ބޯޑަރު ބަންދުކޮށް، ދުނިޔޭގެ އެހެން ޤައުމުތަކުގެ ބޯޑަރުތައް ބަންދުކޮށް ބައިނަލްއަޤްވާމީ ފްލައިޓްތަކުގެ ދަތުރުތައް މުޅިން ހުއްޓުމުންނެވެ.