ރިޕޯޓު: މާކެޓްގައި ފައި ހަރުކޮށްލުމަށް ފަތުރުވެރިކަމުގެ ދާއިރާ އަށް ވެކްސިން މުހިންމު!

މުޅި ދުނިޔެ ބަލިމަޑުކަމެއްގެ ތެރެއަށް ވެއްޓި ދަތުރުފަތުރުގެ އުނދަގޫތައް ކުރިމަތިވެފައިވީ ނަމަވެސް މިދިޔަ އަހަރުގެ ޖޫން މަހުން ފެށިގެން ރާއްޖެ ހުޅުވައިލުމުގެ ނަތީޖާ ކިތަންމެހާ ވެސް ފޮންޏެވެ. ސަރަހައްދު ގިނަ ގައުމުތައް އަދި ވެސް ބަންދުވެފައި އޮތުމާއި ގިނަ މަންޒިލްތައް އަދިވެސް ހުޅުވާލާފައި ނުވުމުގެ ފައިދާ، ފިނި މޫސުމުގައި ރާއްޖެ އަށް ވަރަށް ބޮޑަށް ލިބެމުން އެބަދެއެވެ. މިދިޔަ ޑިސެމްބަރު މަހުން ފެށިގެން ރާއްޖޭގެ ރިސޯޓްތައް ފުރުމުގެ މައިގަނޑު ސަބަބަކީ ވެސް ޗުއްޓީ ހޭދަކޮށްލަން ބޭނުންވެފައި ތިބި އެތައް ބަޔަކަށް ރާއްޖެ ނޫން އިތުރު މަންޒިލެއް ނެތުމެވެ. ނުވަތަ “އޮޕަޝަނެއް” ނެތުމެވެ. ހާއްސަކޮށް ރާއްޖެއާ ވާދަކުރާ ސްރީ ލަންކާ އާއި ބެންކޮކް އަދި މެލޭޝިޔާގެ ބޯޑަރުތައް ބަންދުވެފައި އޮތުމަކީ ރާއްޖެ އަށް އޭގެ ފައިދާ ލިބުނު މައިގަނޑު ސަބަބެވެ. ނަމަވެސް މި “އެޑްވާންޓޭޖް” ދެމެހެއްޓޭނީ ކިހާ ދުވަހަކު ހެއްޔެވެ؟

ކޮވިޑްގެ ހާލަތުން ގައުމުތައް މިހާރު އަންނަނީ އަރައިގަންނަމުންނެވެ. މާޗްމަހާ ހަމައަށް ގިނަ ގައުމުތައް ވަރަށް ބޮޑަށް ހުޅުވާލާނެ ކަމަށް ބެލެވެއެވެ. އަދި ގިނަ ގައުމުތަކެއްގައި ކޮވިޑް-19 އަށް ވެކްސިން ދޭން ފެށުމާ އެކު މާޗްގެ ކުރިން ވެސް ލުއި ލިބޭނެ ކަމަށް މިހާރު ވަނީ ބެލެވެން ފަށާފައެވެ. ކްރިސްމަސް އާއި އާ އަހަރުގެ ޗުއްޓީ ބޯމަތިވި އިރު ރާއްޖެ ނޫން މަންޒިލެއް މި ސަރަހައްދުގައި ނެތް ނަމަވެސް މާކެޓްގައި ކުރިއަށް އޮތް ދުވަސްތަކުގައި އެހެން ގައުމުތަކާ ވެސް ރާއްޖެއިން ވާދަކުރަންޖެހޭނެއެވެ. އަދި ލަންކާ ވެސް ހުޅުވާލުމާއި މާޗްމަހާ ހަމައަށް އަންނަ އިރު މެލޭޝިޔާ އާއި ތައިލެންޑާއި ފިލިޕީންސް ވެސް ހުޅުވާލުމުން ޗައިނާ އާއި ޔޫރަޕް އެހެން ބައްރުތަކުގެ ފަތުރުވެރިން މިސްރާބް އެ މަންޒިލްތަކަށް އެނބުރުމުގެ ފުރުސަތު ބޮޑެވެ. މި ދަނޑިވަޅުގެ ފައިދާ ރާއްޖެ އަށް އަދިވެސް ނެގުމަށް އޮތް ފުރުސަތު .އެހެން ވާދަވެރި މަންޒިލްތަކަށް ވުރެ ބޮޑެވެ. އެންމެ ބޮޑު ސަބަބަކީ ރާއްޖެ އުފެދިފައިވާ ގޮތުންނާއި އާބާދީ މަދުވުމެވެ

advertisement

ފަތުރުވެރިކަމުގެ މާކެޓްގައި ރާއްޖެ މި ވަގުތު މާކެޓް ކުރަން އެންމެ ބުއްދިވެރި އެއް ގޮތަކީ “ކޮވިޑް ފްރީ” ނުވަތަ އެ ބަލިން ރައްކާތެރި ގައުމެއްގެ ގޮތުގައެވެ. އެކަން ކުރުމަށްޓަކައި ރާއްޖެއިން ކުރަންޖެހޭ މަސައްކަތް މާ ބޮޑެއް ނޫނެވެ. ކުރަންވީހާ ވެސް ކަމަކީ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ވެކްސިން ދިނުމެވެ. އެ ދާއިރާގައި އުޅޭ ހުރިހާ ފަރާތްތަކަކީ ވެސް ވެކްސިން ލިބިފައިވާ ބައެއްގެ ގޮތުގައި އިސްތިހާރުކުރުމަކީ ރާއްޖެ އަށް ޝައުގުވެރިކަން ބޮޑުކުރުމަށް .މި ވަގުތު ކުރުން މުހިންމު ކަމެވެ

ކޮވިޑްގެ ބަލިމަޑުކަމުގެ ތެރޭގައި އިގްތިސާދީ ގޮތުން އެންމެ ބޮޑު ގެއްލުމެއް ލިބުނު އެއް ގައުމަކީ ވެސް ރާއްޖެއެވެ. އިގްތިސާދުގެ މައި ތަނބަކީ ޓުއަރިޒަމް ކަމަށް ވުމުން ބޯޑަރުތައް ބަންދުވުމާ އެކު ރާއްޖޭގެ އިގްތިސާދު ހުއްޓުމަކަށް އައެވެ. އަދިވެސް މުޅިން އަރައިނުގަނެވެއެވެ. އެ ހާލަތުގައި ފްރޮންޓްލައިނަށް ނުކުމެއް ރިސޯޓް މުވައްޒަފުން ވަނީ ނަމޫނާ ދައްކާފައެވެ. ރާއްޖޭގެ އިގްތިސާދު ކޮޅަށް ޖެހުމުގައި ކުރީ ސަފުގައި ތިބީ ރިސޯޓް މުވައްޒަފުންނާއި ފަތުރުވެރިން ރާއްޖެ ވައްދާ ދޮރާށިން މަރުހަބާ ކިޔަން ތިބި އެއާޕޯޓާއި އިމިގްރޭޝަންގެ މުވައްޒަފުންނެވެ. އެހެންކަމުން ވެކްސިން ދިނުމުގައި .ވެސް އެ ފަރާތްތައް އިސްކުރަން އެބަޖެހެއެވެ

ރާއްޖޭގެ އިގްތިސާދު ފުޅާކުރުމަށްޓަކައި ފަތުރުވެރިކަން ޕްރޮމޯޓްކުރުމުގައި ވެކްސިން ޕްރޮގްރާމްގެ ފުރިހަމަ ބޭނުން ސަރުކާރުން ވެސް ހިފަން އެބަޖެހެއެވެ. މުޅި ފަތުރުވެރިކަމުގެ ދާއިރާއަކީ ރައްކާތެރި ދާއިރާއެއްގެ ގޮތުގައި ދުނިޔެއަށް ސިފަކުރުމަށްޓަކައި އެކީއެކައްޗަކަށް ވެކްސިން ޖަހައި ނިންމާލަން އެބަޖެހެއެވެ. ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި އިމިގްރޭޝަނާއި އެއާޕޯޓްގައި މަސައްކަތްކުރާ މުވައްޒަފުންނަށް ކުރު މުއްދަތެއްގެ ތެރޭގައި ވެކްސިން ފޯރުކޮށްދެވިއްޖެ ނަމަ ދުނިޔޭގެ މާކެޓްގައި “ކޮވިޑް ފްރީ” ޓެގް ޖަހައިގެން މާކެޓް ކުރުމަށް އޮތް ފުރުސަތު އެހެން ގައުމުތަކާ އަޅާ ބަލާއިރު ރާއްޖެ އަށް ބޮޑެވެ. އަދި އާބާދީގެ ގޮތުން ބަލާއިރު ވެސް އެހެން ވާދަވެރި މާކެޓް ތަރަކަށް ވުރެ އަވަހަށް ރާއްޖެ އަށް މި ލަނޑުދަނދި ހާސިލްކުރެވިދާނެއެވެ. އަނެއްކޮޅުން އޮފް ސީޒަންގެ ތެރޭގައި ޗައިނާ ފަދަ ގައުމުތަކުން ފަތުރުވެރިން ނުގެނެވިއްޖެ ނަމަ ރާއްޖެ އަށް ދަތިތަކެއް ކުރިމަތިވާނެއެވެ. ނަމަވެސް ރާއްޖޭގެ ގިނަ ބަޔަކަށް، ހާއްސަކޮށް ފަތުވެރިންނަށް ހިދުމަތް ދޭ ފަރާތްތަކަށް ވެކްސިން ދެވިއްޖެ ނަމަ އެކަން ބަދަލުކޮށްލެވިދާނެއެވެ. ބޯޑަރުތައް ހުޅުވާލާއިރު ދަތުރުކުރުމަށް ކެތްމަދުވެފައި ތިބި އެތައް ބައެއްގެ މިސްރާބު ރާއްޖެ އަށް އަނބުރާލެވި އޮފް .ސީޒަން ޓެގް ބަދަލުކޮށްލެވިދާނެއެވެ. މާކެޓްގައި ފައި ހަރުކޮށްލުމަށް ވެކްސިން މުހިންމެވެ