ރާއްޖޭގައި ފެންނަ %30 ކޭސްތަކަކީ ކޯވިޑްގެ އައު ވޭރިއަންޓް – ޑރ. ޝީނާ

ރާއްޖެއިން މިހާރު ފެންނަ ކޮވިޑް19ގެ އާ ކޭސްތަކުގެ 30 ޕަސެންޓަކީ ވައިރަހުގެ އާ ވޭރިއަންޓް ކަމަށް ޑރ. ޝީނާ މޫސާ ވިދާޅުވެއްޖެ އެވެ. ޤައުމުތަކުގައި ކޯވިޑް-19 ފެތުރެމުންދާ މިންވަރު ބަލާ މިންގަނޑުން ބަލާނަމަ ރާއްޖެ މިވަގުތު އޮތީ ހައިރިސްކު ޙާލަތުގައިކަމަށްވެސް ޑރ. ޝީނާ ވަނީ ވިދާޅުވެފައެވެ.

ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ޕަބްލިކް ހެލްތު އެކްސްޕާޓް ޑރ.ޝީނާ މޫސާ ވިދާޅުވީ ރާއްޖޭގެ މިހާރު މިއޮތީ ކޯވިޑް-19ގެ ހައިރިސްކް ޤައުމެއްގެ ގޮތުގައި ބަލާ ޙާލަތުގައިކަމަށެވެ. އެގޮތުން ފަހަކަށްއައިސް ރާއްޖޭގައި ކޮންމެ ދުވަހަކު ކޯވިޑް-19އަށް ޕޮޒިޓިވްވާ މީހުންގެ ޢަދަދުތައް އިތުރުވަމުން ދަނީ އަންދާޒާ ކުރެވިފައިވާ މިންވަރަށްވުރެވެސް މަތީ މިންވަރަކަށްކަން ޑރ.ޝީނާ ވިދާޅުވިއެވެ. ޑރ. ޝީނާ ވިދާޅުވީ، ރާއްޖޭގައި ކޯވިޑްގެ އައު ވޭރިއަންޓް އެބަ އުޅޭކަމަށެވެ. މިހާރު ފެންނަ ކޭސްތަކުގެ ގާތްގަނޑަކަށް 30 ޕަސެންޓަކީ އައު ވޭރިއަންޓްކަމަށް ޝީނާ ވަނީ ވިދާޅުވެފައެވެ. މިއީ ކޯވިޑް ޖެހޭ މީހުންގެ ތިން ބައި ކުޅަ އެއްބައި މީހުންނެވެ.

advertisement

ވައިރަހުގެ އާ ބާވަތަކީ ކުރީގެ ބާވަތަށްވުރެ ފެތުރޭލެއް އަވަސް ބާވަތެއްކަމަށް މިހާތަނަށް ލިބިފައިވާ މަޢުލޫމާތުތަކުން ފެންނަން އޮތްކަން ފާހަގަކުރައްވައި ޑރ.ޝީނާ ވަނީ މިޙާލަތުގައި ބަލީގެ ޙާލަތު ގޯސްވެ ހޮސްޕިޓަލްތަކުގައި އެޑްމިޓްކޮށްގެން ފަރުވާދޭންޖެހޭ މީހުންގެ ޢަދަދު އިތުރުވުމަކީ ކަންބޮޑުވުމެއްކަން ފާހަގަކުރައްވާފައެވެ.

ކޯވިޑް-19ގެ ކޭސްތައް އިތުރުވެ ޙާލަތު ނުރައްކާތެރި ފައްތަރަކަށް ގޮސްފައިވާ މިދަނޑިވަޅުގައި އެޗްޕީއޭއިން އަންގަވާފައިވާ ރައްކާތެރިކަމުގެ ފިޔަވަޅުތަކަށް ޢަމަލުކުރުމަށް ޑރ.ޝީނާ އިލްތިމާސްކުރެއްވިއެވެ.