މާލެ ސަރަހައްދުގެ 55 އަހަރުން މަތީގެ މީހުންނަށް ވެކްސިން ޖަހަން ފަށައިފި

މާލެ ސަރަހައްދުގައި ދިރިއުޅޭ އުމުރުން 55 އަހަރުން މަތީގެ މީހުންނަށް ކޯވިޑް-19ގެ ވެކްސިން ދޭން ފަށައިފިއެވެ. މާލެ ސަރަހައްދުގައި އުޅޭ 55 އަހަރުން މަތީގެ މީހުންނަށް ވެކްސިންދޭން ފަށާފައިވަނީ މިއަދުއެވެ.

އެޗްޕީއޭއިން ވިދާޅުވީ މާލެއާއި ހުޅުމާލެއާއި ވިލިމާލޭގައި 6 ފެބްރުއަރީ އިން ފެށިގެން ކޮންމެ ދުވަހެއްގެ ހެނދުނު 9:00 އިން ހަވީރު 05:00 އަށް މި އުމުރުފުރައިގެ މީހުންނަށް ވެކްސިން ދެމުން ގެންދާނެކަމަށެވެ.

advertisement

މި އުމުރުފުރާގެ މީހުންނަށް ވެކްސިން ދޭނީ ސޯޝަލް ސެންޓަރާއި، ހުޅުމާލޭ ފްލޫ ކްލިނިކް އަދި ވިލިމާލޭ ޔޫތު ސެންޓަރުގައެވެ. ވެކްސިން ޖަހަން ރަޖިސްޓްރީނުކޮށް ތިބި މީހުން ވެސް މި ސެންޓަރުތަކަށް ދިއުމުން، ރަޖިސްޓްރީކޮށް ވެކްސިން ޖަހައިދޭނެ އެވެ.
ވެކްސިން ޖަހަން އަންނައިރު އައި.ޑީ ކާޑު ނުވަތަ ކާކުކަން އަންގައިދޭ ރަސްމީ ލިޔުމެއް ގެންދިއުމަށް އެޗްޕީއޭއިން ވަނީ އިލްތިމާސްކުރައްވާފައެވެ. އަދި ވެކްސިން ޖަހަންދާ މީހަކީ ބަލީގެ އެއްވެސް އަލާމާތެއް ނެތް މީހަކަށް ވާންވާނެއެވެ. އަދި ކަރަންޓީންގައި ހުރި މީހަކަށް ވެގެން ނުވާނެކަމަށްވެސް އެޗްޕީއޭއިން ވިދާޅުވެއެވެ. ވެކްސިން ޖަހަން ދާއިރު ގަޔަށް ދޫ ފަސޭހައިން ވެކްސިން ޖެހޭނެ ހެދުމެއް ލައިގެން ދިއުމަށާއި ވެކްސިން ޖަހަން ދާއިރު ރަނގަޅަށް ކައިގެން ހުރުމަށް އެޗްޕީއޭއިންވަނީ އިލްތިމާސް ކުރައްވާފައެވެ.

ރާއްޖެއިން މިހާތަނަށް ކޯވިޑްގެ ވެކްސިން 4200އަށްވުރެ ގިނަ މީހުން ވަނީ ޖަހާފައެވެ. ކޯވިޑް-19އިން ރައްކާތެރިވުމަށް ރާއްޖޭގައި ވެކްސިން ޖަހަން ފަށާފައިވަނީ މިމަހުގެ އެއްވަނަ ދުވަހުއެވެ.