އެންމެ ގިނަ ފަތުރުވެރިން އައިސްފައިވަނީ އެމިރޭޓްސްގެ ފްލައިޓްތަކުން

މިއަހަރުގެ މިހާތަނަށް ރާއްޖެއަށް އެންމެ ގިނަ ދަތުރުކޮށް އެންމެ ގިނަ އަދަދެއްގެ ފަތުރުވެރިން އައިސްފައިވަނީ އެމިރޭޓްސްގެ ފްލައިޓްތަކުގައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ނެރޭ “މޯލްޑިވްސް ޓޫރިޒަމް އަޕްޑޭޓް” ރިޕޯޓުގައިވާގޮތުން ފެބްރުއަރީ މަހުގެ 3ވަނަ ދުވަހުގެ ނިޔަލަށް އެމިރޭޓްސްއިން ވަނީ ރާއްޖެއަށް 252 ދަތުރުކޮށްފައެވެ. މި ދަތުރުތަކުގައި ރާއްޖެއަށް ޖުމްލަ 20،741 ފަތުރުވެރިން ވަނީ ޒިޔާރަތްކޮށްފައެވެ. އެމިރޭޓްސްއިން ދަނީ ހަފްތާއަކު 7 ދަތުރު ރާއްޖެއަށް ބާއްވަމުންނެވެ. އެމިރޭޓްސްއިން ރާއްޖެއަށް ދަތުރުތައް ބާއްވަނީ ދުބާއީއާއި ރާއްޖެއާ ދެމެދުއެވެ.

advertisement

މިނިސްޓްރީގެ ތަފާސްހިސާބުތައް ދައްކާގޮތުން 2ވަނައަށް އެންމެ ގިނައަދަދަކަށް ފަތުރުވެރިން އައިސްފައިވަނީ ޤަތަރު އެއަރވޭސްގެ ފްލައިޓްތަކުގައެވެ. ޤަތަރު އެއަރވޭސްއިން ރާއްޖެއަށް 220 ދަތުރުކޮށް، 13،542 ފަތުރުވެރިން ވަނީ އައިސްފައެވެ. ޤަތަރު އެއަރވޭސްއިން ރާއްޖެއަށް ދަތުރުތައް ބާއްވަނީ ޤަތަރުގެ ވެރިރަށް ދޯހާއިން ސީދާ ވެލާނާ އިންޓަރނޭޝަނަލް އެއަރޕޯޓަށެވެ.

ރާއްޖެއަށް 3 ވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިގޯއިންނެވެ. އިންޑިގޯއިން ރާއްޖެއަށް 182 ފްލައިޓް ބާއްވައި 11،897 ފަތުރުވެރިން ވަނީ ރާއްޖެއަށް ގެނެސްފައެވެ. 4 ވަނައިގައި ހިމެނެނީވެސް އިންޑިއާގެ އެއަރލައިންއެއްކަމަށްވާ ގޯ އެއަރއެވެ. އެ އެއަރލައިނުން ރާއްޖެއަށް 200 ފްލައިޓް އަޅާ، 11،687 ފަތުރުވެރިން ވަނީ ރާއްޖެއަށް އުފުލާފައެވެ.